2020-ին ղարաբաղյան հակամարտության կարգավորման բանակցությունները վարվելու են որոշակի փաստաթղթի շուրջ. փորձագետ

2020 թվականին ղարաբաղյան հակամարտության կարգավորման հարցը կմտնի ինտենսիվացման փուլ, բանակցություններն, ամենայն հավանականությամբ, վարվելու են փաստաթղթի շուրջ: Դրա հետ մեկտեղ, հանրությունն ավելի քիչ տեղեկություններ կստանա՝ հաշվի առնելով, որ համանախագահները եւս կողմերին դիտողություն արեցին բանակցային գործընթացի գաղտնիությունը պահպանելու անհրաժեշտության մասին: Այս մասին փետրվարի 3-ին լրագրողների հետ զրույցում ասաց փորձագետ Անժելա Էլիբեգովան:

Նրա խոսքով՝ ԱԳՆ ղեկավարների վերջին հանդիպումը եւ համատեղ հայտարարությունը ցույց տվեց, որ մենք վերջապես մտել ենք բանակցությունների փուլ, իսկ հայկական կողմը գրանցեց օրակարգը եւ գրաֆիկը: «Բանակցությունների ինտենսիվացման հետ միասին կսաստկանա համանախագահների ճնշումը: Ադրբեջանն իր հերթին ակտիվորեն աշխատանք կտանի թե՛ քարոզչության մակարդակում, թե՛ դիվանագիտության, այդ թվում՝ այսպես կոչված, «Ղարաբաղի ադրբեջանական համայնքի» կարգավիճակի ամրապնդման փորձով: Ժամանակը ցույց կտա, թե Հայաստանը սրան որքանով է պատրաստ»,- նշեց Էլիբեգովան:

Փորձագետը հավելեց, որ վերջին հանդիպման արդյունքներով հայտարարության տեքստից ելնելով՝ Հայաստանը հաստատել է, որ 2019 թվականին կողմերի միջեւ պայմանավորվածություն է եղել նաեւ հումանիտար միջոցառումներ անցկացնելու մասին, եւ պատրաստակամություն է հայտնել դրանք շարունակել 2020 թվականին, մինչդեռ դրանց արդյունավետությունը մեծ կասկածներ է հարուցում: «Ինչ վերաբերում է հանդիպման արդյունքներին, Ադրբեջանը հաստատել է Հելսինկյան եզրափակիչ ակտի սկզբունքների վրա հիմնված դիրքորոշումը, իսկ Հայաստանն ավելացրել է «Ղարաբաղից ընտրված ներկայացուցիչների» ներգրավվածության անհրաժեշտության մասին կետը»: Ինչպես տեսանք, այսպիսի ձեւակերպումը մեզ մոտ ոչ միանշանակ արձագանք առաջացրեց: Միաժամանակ, ակնհայտ է, որ Բաքուն պատրաստվում է այնպիսի սցենարի, երբ կկատարվի բանակցություններին ղարաբաղյան կողմին ներառելու փորձը, ինչի վկայությունն է, այսպես կոչված, «Ղարաբաղի ադրբեջանական համայնքի» կարգավիճակի բարձրացման փորձը՝ հաշվի առնելով, որ այդ ՀԿ ղեկավար է ընտրելու խորհրդարանը «վիրտուալ» «Ստեփանակերտի ընտրատարածքից», իսկ այնուհետեւ ներառվելու է տարբեր միջխորհրդարանական պատվիրակությունների մեջ: Այս ֆոնին պատահական չէ նաեւ նրա հանդիպումը Ադրբեջանում ԱՄՆ դեսպանի հետ»,- պարզաբանեց նա:

Փորձագետը հավելեց, որ հայկական ՀԿ-ները եւս պետք է համախմբվեն եւ հանդես գան միասնական ճակատով՝ բարձրացնելով Ադրբեջանիից հայ փախստականների հարցը: Դրանից բացի, հայկական կողմը պետք է աշխատի նրանց կարգավիճակի բարձրացման ուղղությամբ:

Անժելա Էլիբեգովայի կանխատեսումներով՝ Բաքուն քարոզչության առաջմղման համար կշարունակի օգտագործել նաեւ Հայաստանի ներքաղաքական իրավիճակը: «Այս երկրի ղեկավարությունը երբեք չի թաքցրել, որ կապ ունի Հայաստանում հեղափոխության հետ, եւ որ նոր ուժերը իշխանության եկան նաեւ իրենց գործունեության, ինչպես նաեւ Երեւանի մեկուսացման շնորհիվ: Սա խոսում է այն մասին, որ Բաքում հայկական ընդդիմությանը մշտապես օգտագործել է քարոզչական նպատակներով եւ իր քաղբանտարկյալներին անվանել է հայկական գործակալներ: Այս համատեքստում անընդունելի է այն, որ Հայաստանում փորձ է արվում ներկայիս ընդդիմադիրներին ներկայացնել որպես Ադրբեջանի շահերի պաշտպաններ: Սա ավտորիտարիզմի տանող ճանապարհ է»,- եզրափակեց փորձագետը:

Հիշեցնենք, որ հունվարի 28-30-ը Ժնեւում ԵԱՀԿ Մինսկի խմբի համանախագահները առանձին եւ համատեղ հանդիպումներ են անցկացրել Հայաստանի եւ Ադրբեջանի ԱԳ նախարարներ Զոհրաբ Մնացականյանի եւ Էլմար Մամեդյարովի հետ: Այս հանդիպումների արդյունքներով՝ ԱԳՆ ղեկավարաները եւ համանախագահները հանդես են եկել համատեղ հայտարարությամբ: Նոր հանդիպումը տեղի կունենա մոտ ժամանակում: