Փարիզից Մոսկվա թռչող օդանավի օդաչուները վիճել են և խափանել չվերթը
Փարիզից Մոսկվա թռչող ուղեւորատար օդանավի օդաչուների վեճը խափանել է չվերթը եւ վշտացրել ռուսաստանցիներին: Տեղի ունեցածի մասին պատմել է ականատես Կիրիլ Ֆոն Հոֆմանը, փոխանցում է Lenta-ն:
Աղբյուրի տեղեկացմամբ՝ միջադեպը տեղի է ունեցել Air France ավիաընկերության օդանավում, որը կատարում էր AF1744 չվերթը: Հոֆմանը հայտնել է, որ Շառլ դը Գոլ օդանավակայանից թռչելուց առաջ ուղեւորները սկանդալի ձայներ են լսել օդաչուների խցիկից, որից հետո օդանավը վերադարձել է դեպի վայրէջքային տերմինալ:
«Բարձրախոսով ռուսերենով, ֆրանսերենով եւ անգլերենով հայտնել են, որ օդաչուների խցիկում ծեծկռտուք է եղել, եւ թռիչքը կշարունակվի միայն այն բանից հետո, երբ անձնակազմը փոխարինվի»,- հստակեցրել է զբոսաշրջիկը:
Օդաչուներին փոխելուն պես օդանավը թռչել է «Շերեմետեւո», սակայն 1,5 ժամ անց վերադարձել է Շառլ դը Գոլ: «Սրահում անչափ ցուրտ էր, իլյումինատորները սառած էին, անտանելի էր նստելը, ծանր էր շնչելը»,- հիշում է թռիչքը Հոֆմանը:
Նրա խոսքը ՌԵՆ ԹՎ-ի հետ զրույցում հաստատել է ռուսաստանցի Ալֆիա Նեստերենկոն, որը թռչել է նույն օդանավով: «Շատ անհանգիստ էինք թռչում, ասես ավտոբուսն ընթանում էր գյուղական ճանապարհով՝ ամպեր չկային, բայց մշտական տուրբուլենտություն կար: Ինչի՞ մասին է սա խոսում: Այն մասին, որ թեւերը ծածկված էին սառույցով, եւ դրանք չէին կարողանում հաղթահարել օդանավի կառավարումը»,- հստակեցրել է նա՝ հավելելով, որ չվերթը 12 ժամով հետաձգվել է:
Արդյունքում ճանապարհորդները կարողացել են Մոսկվա հասնել այն բանից հետո, երբ ուրիշ օդանավ են նստել: Սակայն, նրանց խոսքով, տեղի ունեցածի պատճառով շատերը չեն հասցրել օդանավը փոխել եւ տոմսը կորցրել են:
2019 թվականի հոկտեմբերին Republican Airways ավիաընկերության օդաչուն եւ ուղեկցորդը վիճել էին օդանավում եւ հայտնվել տեսանյութում: Հրապարակված հոլովակում երեւում է, թե ինչպես է տղամարդը մոտենում կնոջը եւ թքում նրա վրա: Վերջինն ի պատասխան բռնում է նրա պարանոցը եւ ափով 3 անգամ հարվածում դեմքին: Դրանից հետո տղամարդն է սկսում բռունցքներով խփել նրա կողերին: