Հայաստանը կսահմանափակի Չինաստանի քաղաքացիների համար մուտքը՝ կորոնավիրուսի սպառնալիքի պատճառով. նախարար
Հայաստանը կարող է սահմանափակել Չինաստանի քաղաքացիների համար մուտքը՝ 2019-nCoV կորոնավիրուսի սպառնալիքի պատճառով: Այս մասին լրագրողներին հայտնեց առողջապահության նախարար Արսեն Թորոսյանը:
Նրա խոսքով՝ այդ հարցը քննարկվել է վարչապետի հանձնարարականով ստեղծված միջգերատեսչական հանձնաժողովի նիստի ընթացքում: Վերջնական որոշումը կկայացվի մոտ ժամանակներս: Որոշման մասին կհայտարարի արտաքին գործերի նախարարությունը:
Ինչպես նշեց Արսեն Թորոսյանը, Չինաստանից ժամանող մեր հայրենակիցների մուտքի սահմանափակումներ չկան եւ չեն կարող լինել: Ամեն օր Չինաստանից մոտ 20 հայ է ժամանում, եւ օդանավակայանում ստուգում են նրանց ջերմությունը, որից հետո վերցնում են նրանց կոնտակտային տվյալները, որպեսզի մասնագետները 14 օրվա ընթացքում կարողանան վերահսկել նրանց վիճակը, եթե նրանց մոտ հանկարծ կորոնավիրուսի նախանշաններ նկատվեն, եւ այդ դեպքում ժամանակին կկազմակերպվի նրանց բուժումն ու մեկուսացումը: Նախարարի խոսքով՝ բոլոր ժամանողների համար կարանտին սահմանելու որեւէ իմաստ չկա:
Ինչ վերաբերում է այլ երկրների քաղաքացիներին, որոնց մոտ կարող է կորոնավիրուս գրանցվել, դեռ իմաստ չկա Հայաստան մուտքի որեւէ սահմանափակում մտցնել:
Նախարարը նաեւ հիշեցրեց, որ Հայաստանն ուղիղ ավիաչվերթներ չունի Չինաստանի հետ, իսկ շատ այլ երկրների չվերթները ժամանակավորապես դադարեցվել են վիրուսի մեկուսացման համար:
Հիշեցնենք, որ վերջին տվյալներով՝ չինական կորոնավիրուսն արդեն սպանել է 213 մարդ, վարակվածների թիվը հասնում է 9600-ի: Վարակման դեպքեր են գրանցվել Չինաստանից դուրս 18 երկրներում: Չինաստանի շատ քաղաքներ, այդ թվում վարակի բռնկման էպիկենտրոն Ուհանը փակ են կարանտինի համար: