«Դալմա գարդեն մոլ»-ում երկրաշարժ չի եղել․ Ցոլակյան
Հայաստանի երեք մարզերում հրշեջ փրկարարները նոր, ճապոնական տեխնիկայով իրականացնելու են իրենց ծառայությունը։ Երկու կառավարությունների համաձայնությամբ՝ Ճապոնիան Հայաստանին հրշեջ մեքենաների հերթական խմբաքանակն է նվիրել՝ 22 հատ։
Այս մեքենաները նախատեսված են Լոռու, Շիրակի ու Սյունիքի հրշեջ-փրկարարական ջոկատների համալրման համար։
«Սա մեծ քանակություն էր, երբեւիցե այսքան մեծ քանակություն չէր եղել: Սա չի նշանակում, որ մենք լրիվ հագեցած ենք: Կառավարության պայմանագրով նախատեսված էր, որ այս օգնությունը պետք է լիներ Շիրակի, Լոռու եւ Սյունիքի մարզերի համար: Նախորդ անգամ էլ 18 մեքենա տրվել է նույն մարզերին։ Հիմա էնտեղ հագեցվածությունը, կարելի է ասել՝ լիարժեք է»,- մեքենաները ներկայացնելով լրագրողներին՝ ասել է ԱԻ նախարար Ֆելիքս Ցոլակյանը։
«Հաջորդ ծրագրերը, հավանաբար, մյուս մարզերի հետ կապված կլինեն: Մարզեր կան, որ տեխնիկան հին է, «ԶԻԼ»-եր են, «ԿամԱԶ»-ներ կան: Հիմա այնտեղի եղած լավ տեխնիկան տեղափոխելու ենք հավանաբար Երեւան եւ մյուս մարզեր, որտեղ թույլ է վիճակը»:
Ինչ վերաբերում է «Դալմա Գարդեն մոլ»-ի միջադեպին, Ֆելիքս Ցոլակյանն ասաց. «Սեյսմիկ պաշտպանության տարածքային ծառայություն» ՊՈԱԿ-ի աշխատակիցները «Դալմա գարդեն մոլ»-ում տեղադրեցին սարքավորումներ եւ պարզեցին, որ այնտեղ երկրաշարժ ընդհանրապես չէր եղել:
«Մնում էր տեխնիկական ինչ-որ բաներ լինեին: ՀՀ քաղաքաշինության պետական կոմիտեի աշխատակիցներն էլ նայեցին, մերոնք էլ նայեցին, պարզեցին, որ շենքի կոնստրուկցիաների մեջ փոփոխություն չի եղել: Հետո ինչ կլինի, չի լինի, ես չեմ կարող ասել: Դա ապացուցեց, որ դա կողքից ինչ-որ երեւույթ էր, որ ազդել էր: Ցնցումը առաջին եւ երկրորդ հարկերում տեւել է ընդամենը կես ժամ: Դրաից հետո չի կրկնվել:
Երբ մերոնք ասացին, որ օդափոխիչ համակարգի պատճառով է սա, «Դալմա Գարդեն մոլ»-ի ղեկավարությունը հրավիրեց իր մասնագետներին: Վերջիններս նույն կարծիքը հայտնեցին»,- ասաց Ցոլակյանը:
Հիշեցնենք, որ հունվարի 19-ից «Դալմա Գարդեն մոլ» առևտրի կենտրոնը վերսկսել է աշխատանքը: