Մի քանի օր տևած բողոքի թեժ ակցիաներից հետո հունվարի 21-ին Կառավարությունը արձագանքեց անասնապահների, մսավաճառների և միս արտադրող ֆերմերների բողոք-պահանջին

Լրագրող, գերմաներեն լեզվի դասախոս՝ Արկադի Ալեքյանը գրում է.

«Սխալ հաշվարկ էր գյուղնախարարությունը փակելը՝ այն կզբաղվեր այս և նման տարբեր առաջ եկած խդիրներով:

Հայկական ասացվածքի ‹‹Գյուղ կանգնի՝ գերան կկոտրի›› իրավացիությունը երեկ հաստատվեց Կառավարությունում:

Մի քանի օր տևած բողոքի թեժ ակցիաներից հետո հունվարի 21-ին Կառավարությունը վերջապես արձագանքեց անասնապահների, մսավաճառների և միս արտադրող ֆերմերների բողոք-պահանջին՝ հետաձգելով սպանդանոցներում պարտադիր մորթի իրականացումը մինչև հուլիսի 1-ը:

Մսավաճառները, անասնապահները բողոքի ցույց էին անում կառավարության շենքի դիմաց, ինչպես նաև ճանապարհներ փակում Արարատի, Կոտայքի, Արմավիրի որոշ տարանցիկ միջմայրուղիներում, ինչը խնդիր էր առաջացրել բազմաթիվ ուղեփոխադրող տրանսպորտի երթևկության համար մարզից մայրաքաղաք կամ հակառակ ուղղությամբ, ինչպես նաև՝ մերձավոր քաղաքներից գյուղեր տանող մարդատար մեքենաների տեղափոխման համար: Նրանք միահամուռ հավաքված իրենց բողոքի ձայնն էին բարձրացնում առ այն, որ համաձայն չէին Կառավարության այն որոշման հետ, որ խոշոր եղջերավոր անասունների մորթը պարտադիր իրականացվի սպանդանոցներում: Նրանք պնդում էին, որ ավելորդ ծախսեր է իրենց համար անասուններին սպանդանոց տեղափոխումը և հայտարարում, որ հենց իրենք էլ կարող են իրենց տան բակերում կազմակերպել անասունների մորթը, ինչն էլ տարիներ շարունակ այդպես են արել:

Անասնապահները հայտարարում էին նաև, որ կեղծ է սպանդանոցների թիվը հրապարակված, նրանց պնդմամբ չկա բավականին սպանդանոցներ համայնքներում, ինչը խնդիրներ և ավելորդ ծախսեր կառաջացներ իրենց համար:

Բոլորս գիտենք, որ այսօր գյուղացին իր մթերքը սպառում է չնչին գումարով և այդ վաստակածով հազիվ հասցնում գյուղատնտեսական և կենցաղային այլ ծախսերը հոգալու համար:

Հարց. Իսկ ինչու՞ նախկին իշխանավորները երբևէ այս հարցը չէին դրել կառավարության նիստի քննարկմանը: Ի՛նչ է, իրենք չէի՞ն գիտակցում, որ բակերում մորթը հակասանիտարական է և առողջության համար վնասակար: Միգուցե որոշ նախկին իշխանավորներն ունեի՞ն իրենց սեփական ֆերմերները և ապահոված էին անարատ մսով, իսկ որոշ պաշտոնյաների սեղաններին էլ բարձրորակ միսը մատակարարվում էր խնամի, ծանոթ բարեկամական շառավիղով, որն էլ իրենց այդքան մտածելու տեղիք չէր տալիս՝ հարցը լրջորեն քննարկման դնելու համար: Իսկ թե ժողովուրդն էլ ինչպիսի՜ որակի միս կգներ, և այն արդյո՞ք անասնաբույժի կողմից ստուգված էր թե՝ ոչ, դա այդքան էլ էական չէր:

Այն, որ ներկայիս կառավարությունը որոշել է երկրի ողջ տարածքով լուծի սպանդանոցների հարցը, դա միանշանակ ողջունելի է: Բայց ցավալին այն է, որ Կառավարությունը որոշում էր կայացրել թերի հաշվարկների հիման վրա. դա այն է, որ մարզերի համայնքներում փաստացի չկար սպանդանոցների բաշխվածության հստակ քարտեզագրում և գյուղացին պետք է իր տնից հսկայական ճանապարհ անցներ, մինչև հասներ սպանդանոց:

Կարծում եմ Կառավարության սխալ հաշվարկն էր նաև այն, որ մեկ տարի առաջ փակեց գյուղնախարարությունը՝ հաշվի չառնելով այդչափ բողոքներն ու կարծիքները, որն էլ կզբաղվեր այս և նման տարբեր առաջ եկած խնդիրներով:

Ըստ իս՝ Կառավարությունը պետք է մշակեր մի հստակ ռազմավարություն՝ ի օգուտ գյուղացու, և համակարգային հաշվարկված գործելաոճ որդեգրեր և քննարկման ու հանձնարարման մեխանիզմով հանդես գար ՏԿԶ նախարարության հետ՝ համայնքային տարածքներում սպանդանոցների ճիշտ բաշխվածության առումով, իսկ Սննդի անվտանգության տեսչության հետ՝ մսի ստուգման, սանիտարական վերահսկողության, մարզերում որոշ գործող սպանդանոցների սանիտարական վիճակի ստուգման առումով, և ամենակարևորը՝ անասնաբույժների մասնագիտական գիտելիքների քննության հարցով:

Սակայն, հայկական ասացվածքի ‹‹Գյուղ կանգնի՝ գերան կկոտրի›› իրավացիությունը հասկացնել տվեց Կառավարությանը, որ թերի էր հաշվարկված ամեն ինչ: Հետևաբար, հունվարի 23-ի Կառավարության նիստի ժամանակ էլ երկրի վարչապետը պաշտոնական անրադարձավ նորից այս հարցին և հայտարարեց, որ մինչև սույն թվականի փետրվարի 6-ը Կառավարութունը կդիտարկի սուբսիդավորվող վարկերի և լիզինգային ծրագրերում այնպիսի կարգավորումներ անել, որպեսզի սպանդանոցների կառուցման և անհրաժեշտ տեխնիկա, այդ թվում՝ տրանսպորտային տեղնիկայի ձեռք բերման համար ստեղծվեն լավագույն պայմաններ և հետաձգեց մինչև հուլիսի 1-ը, բացառությամբ՝ Երևանի սուպերմակետների, ռեստորանային և սննդի ցանցերը, որոնք կլինեն միայն սպանդանոցներից ներմուծված միս, որն էլ կհավաստի փաստաթղթով, ինչն էլ անվտանգության երաշխիք կհանդիսանա:

Իսկ երեկվա Կառավարության նիստի ժամանակ վարչապետի այն հայտարարությանը, թե կովերին կարելի են պահել անասնագոմերում մինչև -30 աստիճանի՝ էլ ավելի կաթնատվության ակնկալիքով՝ դա էլ թողնենք անասնաբույժների կարծիքին և անասնապահների տարիներ ունեցած փորձին, թե որ ջերմաստիճանն է բարենպաստ կովերին՝ անցնելով խնդրահարույց և ավելի կարևոր ու լուրջ հարցերի քննարկմանը»: