Օրվա իշխանությունը խնդիր ունի արագ ձերբազատվելու ինձանից․ Հրայր Թովմասյանը՝ տան խուզարկությունից հետո (Տեսանյութ)

Այս ամբողջ պրոցեսի հանրային վերահսկողությունը ինձ համար շատ կարևոր է։ Այս մասին այսօր՝ հունվարի 24-ին, լրագրողների հետ զրույցում ասաց ՍԴ նախագահ Հրայր Թովմասյանը՝ իր տան խուզարկությունից հետո։

«Ուզում եմ երկու բանի անդրադառնալ․ 2-3 անգամ ես հրավիրվել եմ հարցաքննության և այսօր էլ տանն էր ինչ-որ քննչական գործողություններ կատարվել։ Իմ խնդրանքը, միջնորդությունը, հորդորը եղել է մեկը, որ ամբողջը տեսաձայնագրվի, որովհետև ես ձեզ ուղղակի վստահեցնում եմ, որ այն, ինչ այսօր կատարվում է, այսօրով չի ավարտվելու։ Ցավոք սրտի, դրանք նոր քրեական գործերի հիմք են դառնալու, և այդ ժամանակ ապացուցողական բազան, թե ով ինչ ասեց, ինչու ասեց, չի լինելու։ Իմ միջնորդությունը ես միշտ կրկնելու եմ, որ այդ ամբողջ հարցաքննությունը տեսաձայնագրվի։ Ինձ համար անհասկանալի է քննչական մարմնի ձեռնպահ մնալը և մերժելը մեր միջնորդությունը, որ հարցաքննությունը և տան խուզարկությունը չձայնագրվի»,-նշեց նա։

Թովմասյանի համոզմամբ՝ մսխվում է երկրի հեղինակությունը․

«Ցավոք սրտի, այն, ինչ տեղի է ունենում այս օրերին Հայաստանում իմ շուրջ, Սահմանադրական դատարանի շուրջ, գալիս է հիմնավորելու, որ խնդիրներն իրոք խորքային են։ Օրվա իշխանությունը խնդիր ունի արագ ձերբազատվելու ինձանից՝ որպես ՍԴ նախագահի, և այդ ամբողջն արվում է շատ կոպիտ, այդ ամենն արվում է ակնհայտ, և դրա մասին իմ ասելով չի, որ մեր հանրությունը և նաև միջազգային հանրությունը տեղյակ է։ Սրա համար ես միայն ցավ եմ ապրում, քանի որ ինձ համար Հրայր Թովմասյանի խնդիրը այս պարագայում երկրորդական է, շատ կարևոր է ինձ համար երկրի հեղինակությունը, երկրի վաղվա օրը։ Չի կարելի այդքան տարիներ հավաքած հեղինակությունը շատ արագ մսխել»։

«Դուք տեսնում եք այս պրոցեսների ընդամենը 10 տոկոսը։ Նախկին ԱԱԾ տնօրենը դրա վերաբերյալ ակնարկ արեց, ես հուսով եմ, ես վստահ եմ, որ իր սպայի պատիվը թույլ չի տա, որ ինքն այդ ամբողջի մասին լռի և այս ամբողջ պրոցեսները՝ երբ են սկսել, ոնց է սկսվել, ինձ հետ ինչ են խոսել, այդ ամենը կդառնա հանրության սեփականություն։ Եթե առ այսօր ես դրա մասին լռում եմ, միայն իմ երկիր հեղինակությամբ է պայմանավորված։ Եթե չեմ սխալվում համաշխարհային պատմության մեջ վերջին անգամ, որ որևէ բարձրագույն դատական ատյանի ղեկավար քրեական հետապնդման է ենթարկվել, եղել է 1803 թվականին ԱՄՆ գերագույն դատարանի նախագահը։ Այս ամբողջը մի օր պետք է լիներ, մի օր մի դատարան, մի դատավոր պետք է պայքարի իր անկախության համար։ Սրանք ուզում եք զրկանք համարեք, ուզում եք հետապնդում համարեք, բայց սա իմ խաչն է, որ ես պետք է տանեմ»,-պնդում է Թովմասյանը:

Հրայր Թովմասյանը հույս հայտնեց, որ Արթուր Վանեցյանը շատ ավելի բան ունի ասելու։

Հարցին՝ այս ամենից հետո չի՞ պատրաստվում հրաժարական տալ, Թովմասյանն ասաց․ «Հայտնի բան կա, ասում է՝ այս ամբողջից հետո դեռ երգո՞ւմ ես, այսինք՝ այս ամբողջից հետո դուք դեռ նման հարց եք տալ՞ս»։

Լրագրողները հետաքրքրվեցին՝ ի՞նչ կարող էր տանն ունենալ, որ խուզարկություն են իրականացրել, Թովմասյանն ասաց․ «Չէի ուզում դրան անդրադառնալ, ասում եմ՝ տվեք փաստաթուղթը կարդամ, ասում է՝ ես կարդացի, դուք լսեցիք»։

Հարցին՝ հնարավո՞ր է նոտարական գրասենյակի վկայականն էին փնտրում, ՍԴ նախագահը հարցով պատասխանեց․ «Ձեր տան վկայականը կարող է մեր տանը լինի՞։ Բնականաբար՝ ոչ»։

Նա վստահեցրեց՝ իր նկատմամաբ գործընթացը քաղաքական է․ «Խնդիրն ավելի խորքային է, ցուցմունք տալուց իմ հրաժարվելը պայամանվորված է նրանով, որ այստեղ ընդհանրապես իրավունք գոյություն չունի, այս ամենի բուն նպատակը քաղաքական է և վատ քաղաքական է, որը ոչ միայն չի բխում իմ շահերից, ձեր շահերից, որևէ մեկի շահերից»։

Թովմասյանն ասաց, որ Նիկոլ Փաշինյանի հետ չի խոսել․ «Չեմ խոսել, նպատակ էլ չունեմ խոսելու»։

Իր հեռախոսազրույցները գաղտնալսելու մասով նա ասաց՝ թող գաղտնալսեն․ «Իմ կյանքի ռեժիմը չի փոխվել, իմ հեռախոսահամարները չեն փոխվել»։