Գյուղացիները Արմավիրի մարզպետարանի ներկայացուցչի խոսքերին չհավատացին. Ցուցարարները փակել են ճանապարհը «Արծվի թևերի» մոտ (Տեսանյութեր)

Արմավիր-Երևան մայրուղու մոտ Մրգաշատ գյուղի հատվածում բողոքի ակցիա իրականացնող գյուղացիներին վրդովեցրեց Արմավիրի մարզպետարանի գյուղատնտեսության և բնապահպանության վարչության պետ Արթուր Այվազյանի հայտարարւթյունը, որ Արմավիրի մարզը սպանդանոցի խնդիր չունի։

«Այստեղ հայտարարում են, որ ամբողջ մարզը սպանդանոցի խնդիր չունի։ Ժողովուրդ, եթե այսքան բան լսում եք, հելեք, մեծ ու մանուկ եկեք այստեղ ու ասեք, որ այստեղ խնդիր կա։ Այսօր մեր տեղը ինքն եկել, մեր հարցիրն պատասխանում է, որ խնդիր չկա»,-հայտարարեց գյուղացիներից մեկը։

Անասնապահներից մեկն էլ պնդեց՝ պետք է շուկան գա բալանսի, նոր պահանջեն սպանդանոցում մորթ իրականացնել․ «Գյուղացիները համաձայն չեն, որ ֆիքսված 10 հազար դրամ լինի, բացի այդ չկա սպանդանոցների բավարար քանակը։ Որոշել եք, հարց չկա, թողեք շուկան գա բալանսի, նոր պահանջեք սա»։

Այվազյանի պնդմանը, որ սպանդանոցներում շուկայական գնով կգնեն միսը, գյուղացիները հակադարձում էին․ «Սուտ է խոսում»։

Անասնաբուծությամբ զբաղվող գյուղացիները փակեցին նաև Երևան-Սևան ավտոճանապարհը «Արծվի թևերի» մոտ գտնվող հատվածը։

Հիշեցնենք, որ այս տարվա հունվարի 15-ից ուժի մեջ է մտել կառավարության ընդունած որոշումը, ըստ որի` Հայաստանի ամբողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն անվտանգության երաշխիք է։

Նշենք, որ այսօր գյուղացիները Արարատի մարզում ևս փակել էին մայրուղին, սակայն ավելի ուշ բացեցին՝ պայմանով, որ երեկոյան մարզպետարանում հարցի վերաբերյալ քննարկում է լինելու: Ցույց էր ընթանում նաև Արմավիրի մարզում։

Տեղի էր ունեցել քաշքշուք ոստիկանների և գյուղացիների միջև: