Անասնապահների բողոքի ակցիան նոր թափ է հավաքում. Ցուցարարների և ոստիկանների միջև հրմշտոց սկսվեց
Ինչպես քիչ առաջ Operativ լրատվականը հաղորդել էր, անասնաբուծությամբ զբաղվողները, որ դժգոհում են հունվարի 15-ից ուժի մեջ մտած սպանդանոցային մորթի պարտադիր պայմանից, բողոքի ակցիա են անցկացնում Արմավիրի և Արարատի մարզերում:
Թող սպանդանոցի մորթի օրենքը հանողները գան, սպանդանոցները ցույց տան, դրանց պայմանները ցույց տան, թող գան, տեսնեն, կա՞ն բոլոր պայմանները: Այս մասին հայտարարեցին Արմավիր-Երևան մայրուղու մոտ Մրգաշատ գյուղի հատվածում բողոքի ակցիա իրականացնող գյուղացիները: Նրանք բողոքում են օրենքի դրույթի դեմ, որով պարտադիր է դառնում անասունների մորթը կազմակերպել միայն սպանդանոցներում:
«Եթե ես իմ անասունին սպանդի ժամանակ չեմ տեսնում, ես ի՞նչ իմանամ, գալիս ասում են՝ երրորդ կարգի միս է, 40 հազար մուծի, որ հրկիզենք. երկրորդ կարգն էլ գազանանոցի համար է: Բայց որ բերեմ փողը տամ, երկրորդ կարգը կդարձնեն առաջին կարգ ու «պլավնի» կանցկացնեն: Թող պարգևատրումների փողերով սպանդանոցներ սրաքեին ժամանակին մինչև պարտադիր լինելը, վստահություն կլիներ, մենք էլ կգնայինք կհանձնեինք: Մեզ ամենամոտ սպանդանոցը Մասիս քաղաքում է, էդ որ ասում են, որ 39 հատ կա Հայաստանում, թող գան ցույց տան»,-ասաց ակցիայի մասնակիցներից մեկը:
Դիտարկմանը, որ ՍԱՏՄ ղեկավարն ասել է, թե սպանդանոցները պետք է հոգան տեղափոխման ծախսերը, գյուղացիներից մեկն արձագանքեց. «Եթե համայնքում մի հատ սպանդանոց է և օրական 4-5 հարյուր գլուխ ապրանք է մորթվում, ո՞նց են հասցնելու այդ մի սպանդանոցով: Հոկտեմբերյանում չկա սպանդանոց, միայն Էջմիածնում է, Հոկտեմբերյանն էլ 97 գյուղ ունի, որ ամեն գյուղից 3 անասուն մորթվի, դա անում է 300 գլուխ, ոնց են հասցնելու:
Մեկ անասունի մեջ ժողովրդին 30 հազար դրամ խաբում են, ի՞նչ սպանդանոց: Ինչքան սարքել են, բոլորը պետք է քանդեն, մեզ վափշե դա պետք չի: Անասունը բեռնատարը բարձելու համար մեծ պրոցես է պետք: Եթե ես իմ անասունը հասցնեմ Էջմիածին, 4 կգ քաշ է գցելու: Դա 10 հազար դրամ է, 10 հազար դրամ վճարելու են սպանդին, մեկ էլ գալիս ասում է՝ միսը երկրորդ կարգի է, պետք է գնա գազանանոցին: Վերջ, ստացվում է, որ ես 10 անասուն ձրի պետք է պահեմ, քանի որ օգուտը էլ չկա: Փաստորեն, ես պետք է կաշառք տամ, որ դու դա սարքես առաջին կարգ: Մենք սպանդանոց չենք ուզում: Եթե ուզում են, թող 500 և ավելի անասուն ունեցողների համար դա անեն: Հողի հարկը վերցնում են, բանկի տոկոսները վերցնում են, հիմա էլ սա: Թողեք մեր երեխեքն էլ չուպա-չուփս ուտեն: Մենք սպանդանոց չենք ուզում»:
Ակցիայի մասնակիցների հետ հանդիպման էր եկել Արմավիրի մարզպետարանի բնապահպանության և գյուղատնտսության վարչության պետ Արթուր Այվազյանը: Նա նշեց, որ մինչև երեկ մարզում աշխատում էր երկու սպանդանոց, մեկը խոշորի, մյուսը՝ խոզի համար. «Հիմա ՍԱՏՄ-ն թույլտվություն է տվել ևս երկու սպանդանոցի, որոնք եթե ոչ այսօրվանից, վաղվանից սկսելու են աշխատել: Պայմանավորվածություն է ձեռք բերվել, որ շուրջօրյ աշխատելու է: Բացի այդ, մարզում 15 մարդ ենք ընդունել երեկ, որոնք պատրաստակամ են առաջիկայում մեկ ամսվա ընթացքում ևս 15 սպանդանոց կառուցել, այդ թվում Դալարիկում, Քարակերտում: Սպանդանոցը պարտավորվում է ձեր անասունը անվճար տեղափոխել: Դուք վճարում եք խոշորի համար 10 հազար դրամ, ոչխարի համար՝ 2500 դրամ: Եթե անվստահություն կա սպանդանոցի կշեռքի նկատմամբ, կարող եք գնալ ձեր կշեռքով»,- ասաց Այվազյանը ՝ հավելելով, որ այս պահին մարզի անասնապահ գյուղացին խնդիրներ չունի:
Գյուղացիները շարունակում էին պնդել, որ իրենց սպանդանոց պետք չի. «Թող իզուր նորերը չսարքեն, որովհետև դա չի լինելու: Ինձ պետք չի ձեր սպանդանոցը»:
Նշենք, որ այսօր գյուղացիները Արարատի մարզում ևս փակել էին մայրուղին, սակայն ավելի ուշ բացեցին՝ պայմանով, որ երեկոյան մարզպետարանում հարցի վերաբերյալ քննարկում է լինելու:
Ավելի վաղ հայտնել էինք, որ անասնաբուծությամբ զբաղվողների դժգոհությունը կապված է իրենց բնակավայրերից սպանդանոցների հեռավորության, դրանց առաջարկած գների հետ: Նրանք պնդում են, որ սպանդանոցային մորթը պարտադիր դարձնելով պետությունը իրենց զրկում է եկամուտից: Նրանք վերջին օրերին բողոքի ակցիաներ էին իրականացնում կառավարության շենքի մոտ` պահանջելով հանդիպում վարչապետի հետ: Նրանց ակցիան նախօրեին ուղեկցվել էր փողոց փակելով:
Հիշեցնենք, որ այս տարվա հունվարի 15-ից ուժի մեջ է մտել կառավարության ընդունած որոշումը, ըստ որի` Հայաստանի ամբողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն անվտանգության երաշխիք է։
«Եկել, խնդրում ենք, որ թողես՝ կով պահենք։ Սաղ ազգով եկել ենք ու վարչապետի կողքն ենք կանգնել, բայց մի հատ մեկդ լուսամուտը չբացեց, ասեր՝ էս իմ հարիֆ, տանջվող գյուղացին է։ Այս մասին, լրագրղների հետ զրույցում ասաց Արարատի մարզի Մխչյան գյուղի բորբոքված բնակիչներից մեկը։ Հիշեցնենք, Մխչյանի բնակիչները ևս բողոքում են օրենքի դրույթի դեմ, որով պարտադիր է դառնում անասունների մորթը կազմակերպել միայն սպանդանոցներում:
«Չեն լինելու սպանդանոցներ։ Կառավարության շենքում մի հոգի չկա՞ր. իրենք դիվան քշելով՝ եկան, նստեցին աթոռին։ Ես անասուն ունեմ, բայց անասնաբույժ չեմ տեսնում։ Չգիտեմ՝ անասունս առո՞ղջ է, թե՞ ոչ։ Տարա սպանդանոց, ասացին՝ հիվանդ է, ո՞վ է ինձ հատուցելու։ Եվրոպային են մատնացույց անում, բայց Եվրոպան փող է հատուցում այդ մարդուն»,- ասաց բնակիչը։
Ակցիայի մասնակիցներից մեկն ասաց, որ ինքը վարկեր ունի, որոնք պետք է մարի անասուններ պահելու միջոցով.
«Փաշինյանը կոչ էր անում՝ վերադարձեք հայրենիք, 20 տարի դուրսն եմ եղել, հետ եմ եկել, վարկ եմ վերցրել, անասուն եմ պահում։ Միայնակ ծնող եմ, որդուս պիտի մեծացնեմ, որ զինվոր տամ։ Տանեմ սպանդանոցի տիրոջը հարստացնե՞մ, պարանը գցեմ վզիս կախվե՞մ։ Էս ի՞նչ է իմ ձեռքերի վիճակը, ջահել տղա եմ, ես էլ եմ ուզում մաքուր շորերով, գալստուկով ու ջիպերով ման գամ», բորբոքվում էր գյուղացին:
Արմավիր-Երևան մայրուղու մոտ Մրգաշատ գյուղի հատվածում բողոքի ակցիա իրականացնող գյուղացիները փորձեցին փակել Արմավիր-Երևան ճանապարհը։ Այստեղ էին ժամանել էին մեծ թվով ոստիկաններ։ Ցուցարարների և ոստիկանների միջև հրմշտոց սկսեց։
Այս պահին իրավիճակը շարունակում է լարված մնալ: