«Մոդելինգն այն ասպարեզը չէ, որտեղ լինելն այնքան հաճելի է, որքան թվում է». Լյուսի Հայրապետյանի արձագանքը կարծրատիպերին, սիրելիին չբացահայտելու պատճառներն ու իրական «մասնագիտությունը»

Մոդել, դերասանուհի, հաղորդավարուհի… կոչումներ, որոնք շատերի համար երազանք են եղել ու շարունակում լինել, սակայն այս մասնագիտությունները յուրացրած Լյուսի Հայրապետյանը նշում է՝ դա այն չի եղել, ինչի մասին ինքը երազել է մանկուց: Մոդելը վստահ է՝ կնոջ ամենակարեւորը «մասնագիտությունը» մայր լինելն է:

NEWS.am STYLE-ը Լյուսիի հետ զրուցել է մոդելինգի, սկզբունքների, մոդելների մասին կարծրատիպերի, էքստրեմալ նախասիրությունների եւ սիրելիին չբացահայտելու մասին:

Լյուսի, մոդել լինելը շատ աղջիկների համար առավելություն է, ինքնավստահություն է փոխանցում. քո դեպքում ե՞ւս այդպես է:

Մոդել լինելն առաջին հերթին պատասխանատվություն է, զգոնություն, նախանձ «ընկերուհիներ»-ի մեծ բանակ եւ ամուր նյարդեր (ծիծաղում է):

Ըստ իս` մոդել-առավելություն-ինքնավստահություն բառերը ոչ մի ընդհանրություն չունեն: Եթե գտնվեն հակառակը պնդողները, ուղարկեք մոտս` հակառակը ապացուցեմ: Այնքան մոդել ցույց տամ, որ մինչեւ կյանքի վերջ երեւի չհասցնեն ինքնահաստատվել եւ իրենցից առհասարակ ինչ-որ բան ներկայացնել:

Այսքան տարի մոդելինգի ոլորտում ես. մոդելինգը բնավորությանդ մեջ ինչ-որ գծեր ձեւավորե՞լ է:

Ախ այդ տարիները...(ժպտում է):

Այո, իհարկե. մոդելինգը ե´ւ տարել է, ե´ւ տվել: Դրա շնորհիվ ես այժմ «միշտ պատրաստ եմ», ապրում եմ թեթեւ: Կարող եմ գնալ երեկո վարելու եւ վերջին պահին միտքս փոխել ու հագնել այլ զգեստ, մազերս քանդել ու հենց այդպես քանդած գնալ, դիմահարդարումից շատ բաներ ուղղակի մաքրել: Հասկացել եմ, որ ամեն ինչ ու ամեն ոք անցողիկ է: Կանք հիմա եւ  այստեղ: Մոդելինգի տարիներից սովորեցի մարդկանց չվստահել (ցավոք, թե բարեբախտաբար), լավություն անել ու ջուրը գցել, ավելի գնահատել ընտանիքս եւ կիսվել միայն մտերիմներիս հետ: Հասկացա, որ սա այն ասպարեզն է, ուր կա նախանձ ու չարություն` շատ կա, բայց ուշադիր ու նրբանկատ լինելու դեպքում կարող ես գտնել գեղեցիկն ու բարին մեկում: Հասկացա, որ հաջողություններովդ կիսվելը այնքան էլ լավ գաղափար չէ... Իրականում մոդելինգն այն ասպարեզը չէ, որտեղ լինելն այնքան հաճելի է, որքան թվում է: Բեմում բոլորն են «բարձր» երեւում, բեմը շոու է ինքնին, իսկ մենք ապրում ենք Աստծո բեմում:

Եղե՞լ է, որ կյանքում բախվես մոդելների մասին կարծրատիպերից որեւիցե մեկին ու դա քեզ բարկացնի: Այդ պարագայում ինչպե՞ս ես արձագանքում:

«Լուս, տենցն են չէ՞ բայց» ձեւակերպումը պատահել է: Ինձ հարցնում են մերոնց մասին. 99% դեպքերում վատ կարծիքներ... Գիտե՞ք, թե ինչ եմ անում. համաձայնվում եմ` ի տարբերություն նախորդ տարիների: Ամեն տեսակ մարդ կա մեր աղջիկների մեջ՝ ինչու՞ բարկանամ: Ամեն ոք ինքն է որոշում իր «բավականն» ու «էլի»-ն: Ինձ հաճախ ասում են .«Լուս, դու ոնց-որ հեչ մոդել չլինես հա, դու մի տեսակ խելացի ես, ուղեղ ունես»: Անկեղծ՝ ուրախանում եմ. երեւի նրա համար, որ ունեմ կայուն արժեհամակարգ եւ բնավորություն: Ինձ պես էլի աղջիկներ կան մերոնց մեջ, վստահ եղեք: Այդ վատ որակավորումները կապ չունեն մոդել լինելու հետ. վերջիվերջո, գյուղ չկա շուն չլինի:

Մոդել, հաղորդավարուհի, երբեմն` նաեւ դերասանուհի... Մասնագիտություններ, որոնց մասին շատ աղջիկներ երազում են մանկուց: Սրանք մտե՞լ են քո մանկության երազանքների մեջ:

Ոչ (ծիծաղում է): Իրականում մանկության այդքան շատ հնչող հարցին.«Մեծանաս ի՞նչ ես դառնալու» ես շատ տրամաբանական պատասխան եմ միշտ տվել` մամա:

Մայրիկը կնոջ ամենակարեւոր մասնագիտությունն է, եթե, իհարկե, հասկանում ես այդ կոչման ամբողջ բովանդակությունը:

Ի՞նչ ես մասնագիտությամբ: Որտե՞ղ ես սովորել:

Ավարտել եմ Երևանի պետական լեզվահասարակագիտական համալսարանի «Օտար լեզուների» Ֆակուլտետը` մանկավարժ, բանասեր, լեզվաբան:

Նաեւ հետագայում ավարտել եմ Շադոյանի դիզայներական նկարչության կուրսը` ստանալով համապատասխան ավարտական սերտիֆիկատ: Հաճախել եմ նաեւ դերասանական կուրսերի, խոսքի վարպետության դասերի:

Հաճախ մոդելները մասնակցում են նաեւ միջազգային գեղեցկության մրցույթների. քեզ, կարծես, թե չենք տեսել այդ հարթակում: Ինչո՞վ է դա պայմանավորված:

Այո, չեք տեսել երկու պարզ պատճառով. ամեն նմանատիպ մրցույթին մասնակցելուց առաջ սիրելի ընկերոջ արգելքը կար ու կար, իսկ ես իմ գիտակից հասուն տարիքում չեմ հիշում, որ մենակ լինեի (ժպիտում է): Եվ հետո՝ չեմ սիրել այդ տգեղ պահը, երբ լողազգեստով պտտվում ես, որ ժյուրիի անդամները` շատ հաճախ նորաձեւության եւ մոդելինգի հետ կապ չունեցող անկապ մարդիկ, գնահատեն մարմնիդ ելեւէջները (ծիծաղում է): Ոչ միշտ էին այդ մրցույթների բոլոր փուլերը անցկացվում բեմում:

Քո ինստագրամյան սթորիներից պարզ է դառնում, որ ակտիվ կյանք ես սիրում վարել: Իսկ ինչպե՞ս ես սիրում հանգստանալ:

Հանգստանալ նույնպես սիրում եմ ակտիվ: Հիշում եմ՝ մի անգամ քրոջս հետ սերֆինգի ժամանակ ուժասպառ միասին ասացինք՝ «Գնանք Երեւան հանգստանանք»: Օդանավում քնելը, դե, իմ մենաշնորհն է. այ այնտեղ հաստատ, որ ակտիվ չեմ հագստանում:

Լուսանկարներից մեկում, նույնիսկ, զիփլայնի վրա էիր գեղեցիկ դիրք ընդունել: Էքստրեմալ խենթություններ հաճա՞խ ես անում:

Շնորհակալություն, որ նկատել եք ու գնահատել: Առաջին անգամն էր: Ընկերոջս հետ էինք, նա վերջին պահին հրաժարվեց, ես` ոչ: Կես ճանապարհին մտածեցի. «Ախր տարօրինակ է, է՜, որ հրաժարվեց. գուցե իրոք վախենալու է»: Հետո մտածեցի. «Ահ, լինող բանը կլինի, թուլանամ ու մաքսիմալ հաճույք ստանամ» (ծիծաղում է): Էքստրեմալի մանյակ եմ. սիրում եմ փորձել: Առիթի դեպքում ռիսկի եմ գնում… Հաջորդը, կարծում եմ, պարապլանով թռիչքը կլինի:

Հաճախ ես խոսում ընկերոջդ մասին, բայց չես բացահայտում նրան: Անձնականը փակ պահելը սնահավատությո՞ւն է:

Կյանքը լի է անակնկալներով. երբեք չես իմանում՝ ինչ կլինի վաղը: Սնահավատության հարց չկա, ամենեւին, ուղղակի հասկացել եմ, որ «5 ուզող ունեմ, 15 չուզող», իսկ սիրտս կլինի զբաղված, երբ սրտիս տակ կբաբախի մեկ այլ փոքրիկ սրտիկ: Միայն այդ ժամանակ կզգամ, որ կատարել եմ ընտրությունս: Այժմ դեռ դրա ճանապարհին եմ եւ հուսով եմ` շուտով կհասնեմ ֆինիշին (ժպտում է):

Ասում են` պրոֆեսիոնալ մոդելը պետք է ներկայանա ցանկացած կերպարում, լինի դա ներքնազգեստ, լողազգեստ, թե չափից դուրս բաց հագուստ: Համաձա՞յն ես այս մտքին: Կա՞ն, արդյոք, սկզբունքներ, որոնք չես անցնի:

Պետք է, եթե ուզի: Կան բաներ, որ չեմ անի, լուքեր, որոնք իմը չեն: Բացության աստիճան ու կոնցեպտ կա, որը մինչ օրս պահպանել եմ եւ, կարծում եմ, այդպես էլ կշարունակվի: Ունեմ ընտրության եւ հրաժարվելու իրավունք: Այդպես եմ վարվել միշտ:

2020-ն ինչպե՞ս դիմավորեցիր ու ինչպե՞ս ես ծրագրում շարունակել:

Դիմավորեցի շատ աշխատանքային եւ ուրախ, իսկական ձմեռային հեքիաթում` Ջերմուկում: Տարին խոստանում է լինել շատ աշխատանքային, ձգտումներով, բայց միեւնույն ժամանակ շատ ծովափնյա, կուլմինացիոն փոփոխություններով լի, նպատակասլաց եւ համառ: Պլանավորում եմ տանջամահ անել 2020-ին (ծիծաղում է):

Սյունե Առաքելյան

Լուսանկարները տրամադրել է Լյուսի Հայրապետյանը