MI-5-ի ղեկավարը կարծում է, որ արհեստական ինտելեկտը կվերափոխի բրիտանական հետախուզության աշխատանքը

Բրիտանական MI-5 կոնտրհետախուզության ծառայության ղեկավար Էնդրյու Փարքերը կարծում է, որ արհեստական ինտելեկտը կվերափոխի բրիտանական հետախուզության աշխատանքը, սակայն չի փոխարինի մարդկանց: Նա նման կարծիք է հայտնել Financial Times-ին տված հարցազրույցում, հաղորդում է ՏԱՍՍ-ը:

Նրա խոսքով՝ արհեստական ինտելեկտը թույլ կտա «վերլուծել հազարավոր մարդկանց տվյալներ՝ առավելագույնս մոտենալով իրական ժամանակին», սակայն ցանկացած դեպքում վերջնական որոշում կընդունեն հատուկ ծառայությունների սպաները: «Տեխնոլոգիաները երբեք չեն փոխարինի մարդկանց»,- ասել է Փարքերը:

Փարքերը կարծում է, որ տեղեկատվության հավաքագրման արդյունավետության բարձրացման «հաջորդ քայլը» կլինի մեքենայական ուսուցումը: Նրա խոսքով՝ դա անհրաժեշտ է մեծ քանակությամբ տեղեկատվությունից օգտակար տվյալներ ստանալու համար: Մեծ Բրիտանիայի ֆինանսների նախարարությունում այդ նպատակով ստարտափեր ստեղծելու եւ անհրաժեշտ գործիքներ մշակելու համար ստեղծվել է անվտանգության հատուկ ներդրումային հիմնադրամ:

MI-5-ի ղեկավարը նաեւ անհրաժեշտ է համարում մանրածախ առեւտրի ընկերությունների, բանկերի եւ ինտերնետ ընկերությունների հետ հատուկ ծառայությունների գործընկերային հարաբերությունների հաստատումը: «Մասնավոր ոլորտն ավելի շատ ինֆորմացիա եւ տվյալներ ունի մեր մասին»,- նշել է նա: