Սամվել Ալեքսանյանի ընտանիքի բիզնեսների նկատմամբ հարկային հսկողություն իրականացնելու որևէ խոչընդոտ չկա. ՊԵԿ նախագահ (Տեսանյութ)
Սամվել Ալեքսանյանին եւ իր ընտանիքին պատկանող բիզնեսների նկատմամբ հարկային հսկողություն իրականացնելու որեւէ խոչընդոտ չկա: Այս մասին, այսօր՝ հունվարի 13-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը:
Նա համաձայնեց, որ ՀԴՄ կտրոն չտրամադրելու պատճառներից մեկն էլ գյուղական վայրերում նիսյա առեւտուրն է. «Այստեղ բոլորս անելիք ունենք, որովհետեւ ոչ թե պետք է մտածենք նիսյա առեւտրի պարագայում ՀԴՄ կտրոն տրամադրելու գործընթացն ինչպես կազմակերպենք, այլ պետք է տնտեսությունը զարգացնենք, որ նիսյա առեւտուր չլինի»:
Ինչ վերաբերում է պնդմանը, որ բոլոր մատակարարները ապրանքը 15 տոկոսով ավելի էժան են մատակարարում հայտնի գործարար Սամվել Ալեքսանյանի ընտանիքին պատկանող խանութներին, Դավիթ Անանյանն ասաց. «Մենք Ալեքսանյանին եւ իր ընտանիքին պատկանող բիզնեսների նկատմամբ հարկային հսկողություն իրականացնելու որեւէ խոչընդոտ չկա: Ամենօրյա ռեժիմով աշխատում ենք բոլոր խոշոր գործարարների մոտ: Որպես գաղտնիք ասեմ, որ խոշորների մոտ հարկային ստվեր կարելի է ասել, չկա: Եթե խոշորները փորձում են օգտվել օրենսդրության այս կամ այն բացթողումից, այդտեղ մենք պետք է ուշադիր լինենք, որ օրենսդրությունը ավելի լավ դիզայն անենք եւ հնարավորություն չտանք, որ իրենք իրենց դիրքը չարաշահեն»:
Դավիթ Անանյանը անդրադարձել է նաև փաստին, որ մաքսայինի 6 պաշտոնատարն անձինք են ձերբակալվել վերջերս՝ ասելով, որ երբ միջին վիճակագրական արժեքային համակարգը անձի մոտ դեռ ձեւավորված չէ կամ շատ հեռու է ձեւավորման առումով, եկամուտը կամ պարգեւավճարը որեւէ ձեւով չի կարող օգնել:
«Եկեք չպատասխանեմ հարցին, թե նրանք հին աշխատողներ էին, թե մեր կողմից նշանակված, որովհետեւ դա մեզ համար որեւէ կապ չունի: Մենք ԱԱԾ-ի եւ ոստիկանության հետ համատեղ միջոցառումներ ենք իրականացնում եւ ոչ միայն մեզ մոտ, ամբողջ կառավարությունում, այդ թվում ուժային կառույցներում, ինքնամաքրման գործընթաց է գնում: Սա դարձել է սովորական գործընթաց»,-ասաց նա:
Անանյանը նաեւ հավելեց. «Եթե մարդը որոշել է, որ պետք է լինի պետական ծառայող, ինքը պետք է նաեւ դրա «անբարենպաստ» հետեւանքները գիտակցի, որ այդ ծառայությունը պետական հատվածում ավելի պակաս է վարձատրվում, քան նույն ծառայությունը մասնավոր հատվածում: Մենք համարվում ենք այն գերատեսչությունը, որտեղ անձանց միջին եկամուտները համեմատաբար բարձր են: Հիմա մենք ասում ենք՝ եթե գումարը բավարար չէ, գնա մասնավոր հատված:
Ձեր նշած օրինակում, երեւի թե անձինք մտածել են, որ կարող են այնպիսի մեխանիզմներով աշխատել, որ լինելով անպատիժ, կարող են հին մեթոդներով գնալ առաջ: Մենք դա բացահայտել ենք»:
Անանյանը խոսեց նաև Ամանորին ՀԴՄ կտրոնների թվի մասին, նշելով, որ դեկտեմբերի 28-ից հունվարի 6-ն ընկած հատվածում ամբողջ հանրապետությունում ՀԴՄ կտրոնների թիվը նախորդ տարվա համեմատ աճել է 32 տոկոսով:
Նրա խոսքով, մոտ 10,5 մլն ՀԴՄ կտրոն է տրամադրվել նախորդ տարվա ավելի քան 7 մլն-ի փոխարեն. «Շուրջ 22 տոկոս ավելացել է շրջանառությունը. 51 մլրդ դրամի շրջանառություն է եղել նախորդ տարվա 42 մլրդ դրամի փոխարեն:Կարեւորը այն է, որ Երեւանում այդ ցուցանիշները պակաս են ընդհանուրից: Օրինակ, այդ 22 տոկոսի մեջ Երեւանի տոկոսը 15 է: Դրա փոխարեն օրինակ Սյունիքում ՀԴՄ կտրոնների թիվն աճել է 124 տոկոսով, շրջանառությունը՝ 97 տոկոսով: Գյումրիում ՀԴՄ կտրոնների քանակն ավելացել է 99 տոկոսով, շրջանառությունը մոտ 70 տոկոսով»,-ասաց Դավիթ Անանյանը:
«Սա մեզ պետք էր, որ հասկանանք, որ Ամանորի տոնակատարության ժամանակ ոչ միայն աշխուժություն է եղել, այլ նաեւ հարկային հսկողության առումով տարածաշրջաններում ավելի լավ վիճակ է եղել: Մարզերում այս ցուցանիշները մեզ ոգեւորում են: Մենք ունենք հարկային կարգապահության աննախադեպ աճ»,-ընդգծեց ՊԵԿ նախագահը: