Որքան ավտոմեքենա է մաքսային ձևակերպում ստացել 2019-ին և որքանով է այն ավել նախորդ տարվանից. ՊԵԿ նախագահ

2019-ին մաքսային ձեւակերպում է ստացել 189 հազար 19 ավտոմեքենա, 2018-ին եղել է 64 հազար: Այս մասին, այսօր՝ հունվարի 13-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը:

Նրա խոսքով, ավտոմեքենաների գծով պետական բյուջեի եկամուտները կազմել են 95 մլրդ դրամ, կամ 58 մլրդ դրամով ավելի նախորդ տարվանից:

«Մեր ընդսդիմախոսներն ասում են, որ ավտոմեքենաների այդպիսի աննախադեպ ներհոսք չենք ունենա 2020 թվականին, հետեւաբար, ինչպե՞ս է ՊԵԿ-ը կարողանալու կատարել բյուջետային ծրագրավորված ցուցանիշները: Սակայն 56,4 մլրդ դրամ հարկ վճարողներին վերադարձնելու վերաբերյալ կառավարության որոշումը նաեւ նպատակ ուներ չեզոքացնել այն եկամտային էֆեկտը, որ մենք ունենք մեքենաների ներհոսքից»,-ասաց նա:

Ըստ Անանյանի՝ մինչեւ 2018-ի հունվարի մեկը հարկ վճարողներից գանձված գերավճարները դրանք անցումային գերավճարներն են, որոնք նախորդ տարիներին հաշվարկվել է որպես հարկային եկամուտ.

«Մենք, ունենալով բյուջետային աննախադեպ կատարողականի ցուցանիշներ, 132,7 մլրդ դրամի ժառնգված պարտքերը մարել ենք հասցնելով 5,9 մլրդ դրամի»,- նշեց ՊԵԿ նախագահը՝ հավելելով, որ այսինքն իրենք 128 մլրդ դրամ վերադարձրել են հարկ վճարողներին՝ այդ չափով հարկեր չպահանջելով նրանցից:

«Մենք ժառանգել ենք նաեւ 143 մլրդ դրամի ավելացված արժեքի հարկի գծով պարտքեր, որոնք կոչվում են դեբետային գերավճարներ: Այդ պարտքն այսօր կազմում է 70,7 մլրդ դրամ: Այսինքն 2019-ին կարողացել ենք 75,4 մլրդ դրամով նվազեցնել այդ պարտքը հարկ վճարողներին:

Ստացվում է, որ 2018-ին հարկ վճարողներին ունեցել ենք պարտք 275,7 մլրդ դրամ, որից անցումային գերավճարի գծով՝ 132,7 մլրդ դրամ եւ դեբետային գերավճարի գծով 143 մլրդ դրամ, իսկ արդեն 2020 թվականի հունվարի 1-ի դրությամբ այդ պարտքը կազմում է 76,6 մլրդ դրամ:

Վարչապետը հայտարարել է, որ երկու տարում հնարավորություն ունենք հարկային եկամուտներն ավելացնել 30-40 տոկոսով: Մենք արդեն նշեցինք, որ շուրջ 200 մլրդ դրամ հետ ենք վերադարձրել հարկ վճարողներին, դրանով նվազեցնելով մեր բյուջետային փաստացի կատորողականի ցուցանիշը:

Եթե տեսնենք, որ 2017-ի փաստացի կատարողականը եղել է 1 տրլն 158 մլրդ դրամ, ապա 2019 թվականի 1 տրլն 464 մլրդ դրամից հանելով դա, մենք ստանում ենք փաստացի այն եկամուտը, որ 2 տարվա համար գերակատարումը կազմում է փաստացի 306 մլրդ դրամ: Եթե այդ 306 մլրդին գումարում ենք այդ 200 մլրդ դրամը, ստացվում է 506 մլրդ դրամ: Եթե այդ 506 մլրը բաժանենք 2017 թվականի բյուջեի եկամուտների ցուցանիշին, մենք կունենանք 44 տոկոս եկամուտների աճ»,-ընդգծեց Անանյանը: