Նոր մանրամասներ՝ «Բարսելոնայի» և Չավիի բանակցություններից

Կատալոնական «Բարսելոնայի» մարզական տնօրեն Էրիկ Աբիդալն ու ակումբի ղեկավար կազմի անդամ Օսկար Գրաուն հունվարի 10-ին Քաթարի մայրաքաղաք Դոհայում հանդիպում են ունեցել «Բարսելոնայի» նախկին ֆուտբոլիստ, «Ալ Սադի» գլխավոր մարզիչ Չավի Էրնանդեսի հետ:

RAC1-ի հաղորդմամբ՝ հանդիպման ընթացքում կատալոնական թիմի ներկայացուցիչները Չավիի հետ քննարկել են նրա՝ «Բարսելոնայի» գլխավոր մարզիչի պաշտոնում նշանակվելու հնարավորությունը:

«Բարսելոնան» Չավիին առաջարկել է 2.5 տարվա պայմանագիր, իսկ 39-ամյա մասնագետը հայտնել է, որ «Բարսելոնայի» առաջարկին կպատասխանի հունվարի 11-ին տեղի ունենալիք «Ալ Ռայանի» դեմ խաղից հետո:

Եթե Չավին ընդունի «Բարսելոնայի» առաջարկը, ապա Իսպանիայի չեմպիոնն ակումբի գլխավոր գրասենյակում երկուշաբթի տեղի ունենալիք արտահերթ ժողովից հետո կհայտարարի Էռնեստո Վալվերդեին պաշտոնանկ անելու մասին, հակառակ դեպքում՝ Չավին «Բարսելոնան» կգլխավորի մրցաշրջանի ավարտից հետո:

Հիշեցնենք, որ հունվարի 9-ին «Բարսելոնան» Իսպանիայի սուպերգավաթի խաղարկության կիսաեզրափակիչում 2:3 հաշվով պարտվեց «Աթլետիկոյին» և դուրս մնաց պայքարից:

Հանդիպման ավարտից հետո հայտնի դարձավ, որ «Բարսելոնան» երկուշաբթի կքննարկի Էռնեստո Վալվերդեին պաշտոնանկ անելու հարցը: