Արման Բաբաջանյանը լկտիաբար մեղադրանքներ է հնչեցնում ՀՅԴ-ի հասցեին. Իշխան Սաղաթելյան
ՀՀ ԱԺ պատգամավոր Արման Բաբաջանյանը պետք է գա դատարան, իր հայտարարությունները հիմնավորի, լսի հակափաստարկները եւ ներողություն խնդրի։ Այս մասին այսօր՝ հունվարի 10-ին, NEWS.am-ի հետ զրույցում ասել է ՀՅԴ ԳՄ ներկայացուցիչ Իշխան Սաղաթելյանը։
Նշենք, որ 2 օր առաջ ՀՅԴ անդամները Արման Բաբաջանյանի դեմ դատական հայց են ներկայացրել եւ պահանջում են դատարանին՝ պարտավորեցնել Արման Բաբաջանյանին՝ հրապարակային ներողություն խնդրել վիրավորանքի համար։
«Նա ԱԺ-ում մեղադրանքներ է հնչեցրել, որի համար պահանջում ենք հրապարակային ներողություն խնդրել։ Այսինքն՝ կա մի անձ, որը լկտիաբար մեղադրանքներ է հնչեցնում կուսակցության հասցեին։ Այս փուլում նպատակահարմար ենք գտել իրավական ճանապարհով հարցին լուծում տալ։
Դատարանում կպարզվի արդյոք ինքը ընդունո՞ւմ է իր դեմ ներկայացված դատական հայցը, թե՞ ոչ։ Նա պետք է գա դատարան եւ իր հայտարարությունները պաշտպանի եւ հիմնավորի, լսի հակափաստարկները, ներողություն խնդրի, ուրիշ ճանապարհ չունի»,- ասաց Իշխան Սաղաթելյանը։
Նշենք, որ ՀՅԴ անդամները երկու դրվագով են Արման Բաբաջանյանի դեմ դատական հայց ներկայացրել։
Ավելի վաղ NEWS.am-ի հետ զրույցում ՀՅԴ անդամների փաստաբան Հայկուհի Սեդրակյանն ասել էր, որ դատական հայցը վերաբերում է դեկտեմբերի 6-ին ԱԺ ամբիոնից ՀՅԴ-ի վերաբերյալ արած Արման Բաբաջանյանի հայտարարություններին. «Ըստ էության, հայցվորները այդ հայտարարությունը համարում են վիրավորական եւ զրպարտչական։ Դրա վերաբերյալ ՀՀ քաղաքացիական օրենսգրքի 1087.1 հոդվածով դատական հայց է ներկայացվել դատարան։ Դատարանից դեռեւս որեւէ որոշում չունենք, քանի որ երեկ է ներկայացվել հայցը։ Միայն այսօր դատական-տեղեկատվական համակարգում երեւում է հայցը։ Վիրավորանքի համար մենք պահանջում ենք հրապարակային ներողություն խնդրել, իսկ զրպարտության համար դրամական փոխհատուցում»։
Հիշեցնենք, որ խոսքը Արման Բաբաջանյանի հրապարակային ելույթների մասին է, որոնցում նա ՀՅԴ–ին անվանել է, մասնավորապես, «ահաբեկչական անցյալով հայտնի այս ուժ» եւ այլն։
Դատական հայց ներկայացրել են ՀՅԴ անդամներից Իշխան Սաղաթելյանը, Աշոտ Սիմոնյանը, Սիմոն Սիմոնյանը, Շաղիկ Մարուխեանը, Արմենուհի Կյուրեղյանը, Լիլիթ Գալստյանը, Միքայել Մանուկյանը, Արթուր Խաչատրյանը, Հակոբ Մաթիլյանը, Տարոն Տոնոյանը եւ Արծվիկ Մինասյանը։