Ինչպե՞ս են ՀԱԿ-ում նշելու Լեւոն Տեր-Պետրոսյանի ծննդյան տարեդարձը
Այսօր լրացավ Հայաստանի Հանրապետության հիմնադիր նախագահ Լևոն Տեր-Պետրոսյանի ծննդյան 75-ամյակը: Այդ կապակյցությամբ շնորհավորական գրառումներ են կատարել ֆեյսբուքյան բազմաթիվ օգտատերեր:
Առաջին նախագահի շրջապատից հայտնեցին, թե ինչպես է նշելու Լեւոն Տեր-Պետրոսյանը իր ծննդյան տարեդարձը: Վերջին տարիներին ավանդույթ է ձեւավորվել, նրա թիմակիցները, մտերիմ-բարեկամները այցելում են առաջին նախագահի առանձնատուն եւ շնորհավորում նրան: ՀԱԿ-ականներն էլ հավաքվում են կուսակցության կենտրոնական գրասենյակում, անգամ տարածքային կառույցներում են բաժակ բարձրացնում եւ շնորհավորում առաջնորդի ծննդյան տարեդարձը:
Մինչ այս պահը առաջին նախագահին ՀՀ բարձրաստիճան իշխանավորներից որեւէ մեկը՝ նախագահ, վարչապետ, ԱԺ նախագահ. շնորհավորական ուղերձներ չի հղել:
Տեր-Պետրոսանը ծնվել է 1945 թվականին հունվարի 9-ին Սիրիայի Հալեպ քաղաքում։ 1946 թ. ընտանիքի հետ տեղափոխվել է Երևան։ Երևանում ավարտել է միջնակարգ դպրոցը, որից հետո 1968-ին ԵՊՀ-ի բանասիրական ֆակուլտետի արևելագիտության բաժինը՝ արաբերեն լեզու և գրականություն մասնագիտությամբ։
Ասպիրանտական շրջանը անցել է Լենինգրադում, 1972 թ. Լենինգրադի համալսարանում պաշտպանել թեկնածուական, իսկ 1987 թ. նույն համալսարանում՝ դոկտորական դիսերտացիան, ստացել բանասիրական գիտությունների դոկտորի գիտական աստիճան: 1988 թվականին փետրվարից ղեկավարել է Մատենադարանի Ղարաբաղ կոմիտեն, մայիսից ընդգրկվել Ղարաբաղյան շարժման Հայաստանի կոմիտեի կազմում, դարձել նրա ազդեցիկ անդամներից մեկը։ Հանդես է եկել ծրագրային ելույթներով, ինչպես նաև ընթացիկ իրադարձությունների ու հնարավոր զարգացումների քաղաքական վերլուծություններով ու քաղաքական զարգացումների կանխատեսումներով։ 1988 թ. դեկտեմբերի 10-ին «Ղարաբաղ» կոմիտեի մյուս անդամների հետ միասին ձերբակալվել է և 6 ամիս պահվել Մոսկվայի «Մատրոսսկայա տիշինա» բանտում։ Նրա գրչին են պատկանում Շարժման տարիներին «Ղարաբաղ» կոմիտեի և ՀՀՇ-ի անունով տարածած 100-ից ավելի թռուցիկներ, Շարժման ճնշման տակ ընդունված ՀԽՍՀ ԳԽ որոշումները։ Դարձել է Հայոց Համազգային Շարժման հիմնադիր անդամ, նրա վարչության նախագահ։
1989 թվականի օգոստոսին ընտրվել է ՀԽՍՀ Գերագույն խորհրդի պատգամավոր։ Լևոն Տեր-Պետրոսյանի և նրա թիմի դեմ հարուցվել է քրեական գործ՝ ընտրությունների մասին օրենքի խախտումների կապակցությամբ։ Սակայն, Տեր-Պետրոսյանի Գերագույն խորհրդի նախագահ ընտրվելուց հետո Երևանի դատախազությունը դադարեցրել է քրեական գործը։ 1990 թվականի հուլիսին Լևոն Տեր-Պետրոսյան դարձել է ԳԽ-ի նախագահության անդամ։ 1990 թ. մայիսին կրկին ընտրվել է Գերագույն խորհրդի պատգամավոր, նույն թվականի օգոստոսի 4-ին՝ Գերագույն խորհրդի նախագահ։ Լևոն Տեր-Պետրոսյանը 1991 թվականի հոկտեմբերի 16-ին ձայների մեծամասնությամբ (83, 4%) ընտրվել է Հայաստանի Հանրապետության նախագահ։ Նույն պաշտոնում վերընտրվել է նաև 1996 թվականի սեպտեմբերի 22-ին։
Նա 1991-95-ին Բաբկեն Արարքցյանի հետ համատեղ ղեկավարել է ԳԽ Սահմանադրական հանձնաժողովը, որի մշակած Սահմանադրության տեքստը արժանացել ԳԽ-ի հավանությանը և 1995 թվականի հուլիսի 5-ին ընդունվել համաժողովրդական հանրաքվեով։
Լևոն Տեր-Պետրոսյանն ամուսնացած է, ունի որդի և երեք թոռ: