Բաքվի գործակալական ցանցը վաղուց աշխատում է Հայաստանի դեմ ողջ տարածաշրջանում. փորձագետ
Բաքվի գործակալական ցանցը ողջ տարածաշրջանում վաղուց աշխատում է Հայաստանի դեմ։ Այս մասին լրագրողների հետ հանդիպման ժամանակ հունվարի 8-ին ասել է Ադրբեջանի հայերի ասամբլեայի նախագահ Գրիգորի Այվազյանը։
Նրա խոսքով՝ պատերազմի տարիներին այդ ցանցի աշխատանքը նկատելի էր նաեւ Հյուսիսային Կովկասում, երբ տեղի բնակիչներին մոլորեցնում էին՝ ապատեղեկատվություն տարածելով այն մասին, թե հայերն իբր պատրաստվում են զավթել Կրասնոդարի եւ Ստավրոպոլի երկրամասերը։
«Նման սադրանք հայերի դեմ մենք տեսանք նաեւ Ղազախստանում գիշերային ակումբի միջադեպից հետո։ Ուստի, ոչ մի զարմանալի բան չկա, որ նման սադրանքներ գալիս են նաեւ Հայաստանի վարչապետի անունից»,- նշել է նա։
Հիշեցնենք, որ Ֆեյսբուք սոցիալական ցանցի «Դիանա Հարությունյան» էջից տարածվել է կեղծ տեղեկություն այն մասին, թե վարչապետ Փաշինյանն իբր շնորհավորել է ԱՄՆ-ին Իրանի բարձրաստիճան պաշտոնյաների դեմ գործողությունների համար։ Կեղծարարությունը «որսացել» են ադրբեջանական լրատվամիջոցները։
Ֆեյք էջի օգտատիրոջը ներկայացվել է մեղադրանք 226 հոդվածի 2-րդ մասին 1-ին կետով եւ 254 հոդվածի 1-ին մասով։ Որպես խափանման միջոց ընտրվել է կալանավորումը։
Ինչ վերաբերում է Ադրբեջանում ընտրությունների հետ կապված կադրային փոփոխություններին, դրանք, ըստ Գրիգորի Այվազյանի, սերտորեն կապված են ղարաբաղյան խնդրի հետ:
«Մենք տեսնում ենք Մեհրիբան Ալիեւայի կլանի ուժեղացման գործընթաց: Սակայն Իլահմ Ալիեւի հիմնական նպատակն է ունենալ այնպիսի կադրեր, որոնք անառարկելիորեն կկատարեն իր ցուցումները»,- նշեց նա:
Փորձագետը նկատեց, որ Ադրբեջանը վաղուց որոշում է կայացրել Ղարաբաղի հարցով սկզբունքային դիրքորոշման կապակցությամբ:
«Այս դիրքորոշումը պայմանավորված է նրանով, որ Ղարաբաղը պետք է լինի Ադրբեջանի կազմում: Բացի այդ, մտապես խոսում են որոշակի պայմանավորվածությունների, «Լավրովի պլանի» մասին: Հայկական կողմը դրան պատասխանում է նոր սպառազինության գնմամբ, որը տեղավորվում է բոլոր գործընթացների տրամաբանության մեջ, ներառյալ՝ պատերազմին նախապատրաստվելու տրամաբանությունը»,- եզրափակեց նա:
Հիշեցնենք, որ 2020-ի փետրվարի 9-ին Ադրբեջանում կանցկացվեն արտահերթ խորհրդարանական ընտրություններ: