Ղազախստանում պարգևատրել են կործանված ինքնաթիռի ուղեւորին
Ալմաթիի տարածքում կործանված ինքնաթիռի ուղեւոր Թեմիրլան Քադաուովը պարգեւատրվել է մեդալով արտակարգ իրավիճակում խիզախություն ցուցաբերելու համար, հայտնում է Ղազախստանի մայրաքաղաքի ոստիկանության մամուլի ծառայությունը, հաղորդում է Ինտերֆաքս-ը:
Հինգշաբթի՝ հունվարի 2-ին, 23-ամյա Քադաուովին մրցանակը շնորհել է քաղաքի ոստիկանության ղեկավար Սերի Քուդեբաեւը: «Երիտասարդ տղամարդը խիզախություն էր ցուցաբերել արտակարգ իրավիճակում եւ ինքնազոհաբար սեփական մարմնով ծածկել ու պաշտպանել կողքին նստած հղի կնոջը: Բացի այդ, երիտասարդը, չնայած ստացած վնասվածքին, օգնել էր տարհանել մյուս ուղեւորներին նախքան արտակարգ ծառայությունների ժամանումը»,-ասվում է հաղորդագրության մեջ:
Bek Air ավիաընկերության Fokker-100 ինքնաթիռը, որը դեկտեմբերի 27-ին կատարում էր Ալմաթի-Նուր Սուլթան չվերթը, օդանավակայանից թոիչք կատարելուց անմիջապես հետո կորցրել է բարձրությունը, ճեղքել բետանե դարպասը, բախվել երկհարկանի շինությանը եւ ընկել բնակելի թաղամասում:
Կործանման հետեւանքով, ըստ Ղազախստանի ՆԳՆ-ի տվյալների, զոհվել է 12 մարդ, այդ թվում՝ օդաչուն, վիրավորվել է ավելի քան 50 մարդ: Ինքնաթիռում ընդամենը եղել է 93 ուղեւոր եւ անձնակազմի 5 անդամ:
Աղետի հնարավոր պատճառներից քննիչներն առանձնացնում են անձնակազմի սխալը, տեխնիկական անսարքությունն ու նավիգացիոն ծառայությունների աշխատանքը: Bek Air ավիածառայության տնօրեն Էրիկ Սապարովը ենթադրել է, որ արտակարգ պատահարի պատճառը կարող էր լինել կործանված ինքնաթիռի թռիչքից մեկ րոպե առաջ ուրիշ ինքնաթիռի թողած հետագիծը: