Ղարաբաղյան կարգավորման հարցում իշխանությունները չպետք է խոսեն երեք ժողովուրդների իրավունքների մասին. քաղաքական գործիչ

Հայաստանի իշխանությունները ղարաբաղյան կարգավորման հարցում պետք է խոսեն բանակցություններին երեք կողմերի ներգրավման անհրաժեշտության, այլ ոչ թե երեք ժողովուրդների իրավունքների մասին։ Այս մասին լրագրողների հետ հանդիպման ժամանակ դեկտեմբերի 26-ին ասաց «Ազգային օրակարգ» կուսակցության նախագահ Արա Հակոբյանը։

Նրա խոսքով՝ ինչ-որ «ադրբեջանական համայնքի» արծարծվող գաղափարը կապված է Նիկոլ Փաշինյանի՝ երեք ժողովուրդների շահերը հաշվի առնելու անհրաժեշտության հայտարարությունների հետ։ «Չկա երեք ժողովուրդ, կա երկու ժողովուրդ եւ բանակցությունների երեք կողմ։ Անհրաժեշտ է աշխատել այն ուղղությամբ, որպեսզի Ղարաբաղը ներգրավվի բանակցային գործընթացին»,- նշել է նա։

Քաղաքական գործիչն ավելացրել է, որ Բրատիսլավայում Ադրբեջանի ԱԳՆ ղեկավարն իր հայտարարությամբ «կարմիր գծեր» անցկացրեց, այնինչ մեր նախարարը ակնհայտորեն զիջում էր ոչ միայն Մամեդյարովի խոսքերին, այլեւ այն հայտարարություններին, որոնք անում էին Հայաստանի նախկին իշխանությունները։

Հակոբյանն ընդգծեց Ղարաբաղում 2020 թվականին արժանավոր խորհրդարանական եւ նախագահական ընտրությունների անցկացման կարեւորությունը՝ առանց արտաքին միջամտության։ «Ղարաբաղի բնակչության դիրքորոշումը պետք է արտահայտվի միասնական ճակատով, եւ անհրաժեշտ է կասեցնել դրան դիմակայելու բոլոր փորձերը»,- ընդգծեց նա։

Իր հերթին, «Ազգային օրակարգ» կուսակցության անդամ, քաղաքագետ Ավետիք Չալաբյանը նշեց, որ անթույլատրելի են «ադրբեջանական համայնք» վիրտուալ հասկացության եւ Ղարաբաղի կարգավիճակի հավասարեցման փորձերը։ Նա ավելացրեց, որ Հայաստանի իշխանություններն այս տարի չեն կարողացել առաջ շարժվել ղարաբաղյան հակամարտության կարգավորման հարցում։ «Կարեւոր է նաեւ հասնել այն բանին, որ Ղարաբաղում ընտրությունների արդյունքների հիման վրա կազմավորվի կենսունակ խորհրդարան, որը կկարողանա դառնալ նախագահի օրենսդրական հակակշիռը։ Պետք է բացառել այնպիսի իրավիճակը, երբ Ղարաբաղի ճակատագիրը, ինչպես եւ Հայաստանինը, վճռի մի մարդ»,- ընդգծեց Չալաբյանը։