Ռուսաստանը շատ զգուշորեն է վերաբերվում Հայաստանի ներքաղաքական գործընթացներին. Կոպիրկինի ասուլիսի ուշագրավ շեշտադրումները
Ռուսաստանը և ռուսական բիզնեսը ուշադիր հետևում են Հայաստանում տեղի ունեցող իրադարձություններին: Նրանք ուշադիր հետևում են այն փոփոխություններին ու բարեփոխումներին, որոնք ձեռնարկում է երկրի ղեկավարությունը, և այն ռազմավարություններին, որոնք մշակվում են տնտեսական, սոցիալական, հումանիտար եւ այլ ոլորտներում: Այս մասին դեկտեմբերի 24-ին տարեվերջյան ամփոփիչ մամուլի ասուլիսի ժամանակ ասաց Հայաստանի Հանրապետությունում Ռուսաստանի Դաշնության արտակարգ եւ լիազոր դեսպան Սերգեյ Կոպիրկինը:
Ընդ որում՝ նա նշեց, որ գործընկերների և խորհրդատուների, այդ թվում՝ արտաքին, ընտրությունը իր՝ Հայաստանի ինքնիշխան գործն է: «Մեզ համար անչափ կարեւոր է, որպեսզի այն փոփոխությունները, որոնք կատարվում են երկրի ներսում եւ այն ոլորտներում, որոնք ուղղակիորեն առնչվում են մեր սերտ հարաբերություններին, վտանգավոր խզում չստեղծեն այն ամենի, ինչ արվում է, եւ մեր հարաբերություններում տեղի ունեցողի միջեւ: Բնականաբար, այդ հարաբերությունները պետք է հարմարվեն փոփոխվող աշխարհին եւ փոփոխվող իրողություններին: Բայց սա գործընթաց է, հատկապես՝ եթե խոսքը դաշնակիցների մասին է, որը պետք է ենթադրի հարաբերություններին խնամքով մոտեցում, միմյանց շահերը հաշվի առնել, բայց նաեւ, բնականաբար, պետությունների ինքնիշխան հավասարության սկզբունքի անշեղ պահպանում»,- ասաց Ռուսաստանի դեսպանը:
Սակայն և Կոպիրկինը շեշտադրեց, որ Ռուսաստանը շատ զգուշորեն է վերաբերվում Հայաստանի ներքաղաքական գործընթացներին: «Շատ կարեւոր է, որպեսզի Հայաստանում իրավիճակը լինի խաղաղ, կայուն, որպեսզի առավելագույնս հնարավոր դառնա քաղաքական, հասարակական ուժերի կոնսենսուսը»,- ասաց դեսպանը:
Ընդ որում, նա նշեց, որ Ռուսաստանի համար առանցքային պահ է դաշնակցային հարաբերությունների պահպանումն ու ամրապնդումը: Ինչ վերաբերում է ներքաղաքական օրակարգում տվյալ հարցի կիրառմանը, ապա Ռուսաստանի համար, դիվանագետի խոսքով, կարեւոր է ոչ թե քաղաքական իրավիճակը, այլ երկկողմ հարաբերությունների պահպանումն ու ամրապնդումը: «Եվ մենք կաշխատենք այդ ուղղությամբ»,- նշեց նա:
Անդրադառնալով այդ թեմայով շահարկումներին, դեսպանը նկատեց, որ դրան բացասաբար է վերաբերվում:
Ինչ վերաբերում է Ղարաբաղյան հակամարտության կարգավորման խնդրին, Կոպիրկինը նշեց, որ այն շարունակում է մնալ ՌԴ ղեկավարության ուշադրության կենտրոնում:
Նրա խոսքով՝ Ղարաբաղյան հակամարտության կարգավորումը եղել է եւ մնում է Ռուսաստանի արտաքին քաղաքականության առաջնահերթություններից մեկը: «Ռուսաստանը միջնորդ է, որը փորձում է օգնել քաղաքական ճանապարհով կարգավորմանը հասնելուն՝ երկու կողմերի համար ընդունելի տարբերակների հիման վրա»,- ասաց Կոպիրկինը:
Դեսպանն անդրադարձավ նաև ռուսաստանցի զբոսաշրջիկների՝ Հայաստան այցելություների վիճակագրությանը և հույս հայտնեց, որ ամանորյա տոներին ռուսաստանցի զբոսաշրջիկների թիվը կավելանա։
Համենայն դեպս, դեսպանի խոսքով՝ այն միտումները, որոնք կարելի է տեսնել վերջին ժամանակներս, վկայում են հենց այդ մասին։ «Համենայն դեպս, ես անձամբ ամեն կերպ կնպաստեմ դրան, այդ թվում եւ այստեղ հրավիրելով իմ ընկերներին»,- ասաց նա։
Պատասխանելով լրագրողի Ադրբեջանին հինգերորդ սերնդի բազմաֆունկցիոնալ Սու-57 կործանիչի հնարավոր վաճառքի մասին հարցին, Կոպիրկինը կարծես խուսափեց պատասխանից՝ նշելով, որ իր համար դժվար է մեկնաբանել լրատվամիջոցներում հայտնված հաղորդումները։
Նշենք, որ ավելի վաղ ԶԼՄ-ներում տեղեկություն էր հայտնվել, թե Ադրբեջանը հետաքրքրված է հինգերորդ սերնդի նորագույն ռուսական Սու-57 կործանիչների գնմամբ։ Նաեւ տեղեկացվում էր, որ բանակցային գործընթացի հավանություն տրվել էր բարձրագույն քաղաքական մակարդակով։
Արժե նշել, որ վերջին տասնամյակում Բաքուն Ռուսաստանից գնել է մոտ 5 մլրդ դոլարի սպառազինություն։ Կնքվել են երկու դիվիզիոն С-300ПМУ-2 զենիթահրթիռային համակարգերի, Т-90С 100 տանկի եւ 118 միավոր БМП-3 հետեւակի մարտական մեքենաների, 18 ինքնագնաց հրետանային «Мста-С» սարքերի, 18 «Սմերչ» համազարկային կրակի հրթիռային համակարգերի արձակման սարքերի եւ այլ ռազմատեխնիկայի գնման պայմանագրեր։