Հայաստանում գործող ավիաընկերությունների համար նոր խաղացողներից լուրջ ռիսկեր կան. «Իմ քայլը»
Հայաստանի շուկայում արդեն գործող ավիաընկերությունների համար անհավասար մրցակցային պայմաններ են ստեղծվում: Այս մասին դեկտեմբերի 3-ին ԱԺ նիստում Քաղաքացիական ավիացիայի կոմիտեի մշակած օրինագծի քննարկման ժամանակ, որով նախատեսվում է օդի հարկից ազատել նոր ուղղություններով թռչող ավիաըկերություններին, ասաց իշխող «Իմ քայլը» դաշինքի պատգամավոր Բաբկեն Թունյանը:
Նրա խոսքով՝ խորհրդարանական հանձնաժողովի նիստի ժամանակ իրենց հավաստիացրել են, որ դա այդպես չէ, սակայն ինքը հետաքրքրվել է եւ պարզել, որ այստեղ լուրջ ռիսկեր կան, քանի որ Հայաստանում գործող որոշ ավիաընկերություններ կարող են շուկայից դուրս մղվել:
«Ասենք՝ «Air France» ավիաընկերությունը, որը Հայաստան չվերթ է իրականացնում Շառլ դը Գոլի անվան օդանավակայանից…Հիմա, եթե մենք ցանկանում ենք նոր ավիաընկերություն ավելացնել եւ չենք ֆիքսում նոր ուղղությունը, այլ ֆիքսում ենք նոր օդանավակայանը, ապա դա նշանակում է, որ փարիզյան ուրիշ օդանավակայանից որեւիցե բյուջետային ավիաընկերություն կարող է Հայաստան չվերթ իրականացնել՝ օգտվելով այս արտոնությունից, ինչի հետեւանքով Հայաստանում երկար տարիներ գոծած ավիաընկերությանը մենք վատ վիճակում կդնենք»,- պարզաբանեց պատգամավորը: Թունյանը նաեւ ուշադրություն դարձրեց այն փաստին, որ Տնտեսական մրցակցության հարցերի հանձնաժողովի եզրակացությունը դրական է եղել, սակայն 4 էջում շարադրվել են բոլոր հնարավոր ռիսկերը: