Սուդանի նախկին նախագահ ալ Բաշիրին մահապատիժ է սպառնում
Բանտարկության մեջ գտնվող Սուդանի նախկին նախագահ Օմար ալ Բաշիրին մահապատիժ է սպառնում 1989 թվականի ռազմական հեղաշրջմանը մասնակցության եւ այն ժամանակ գործող՝ դեմոկրատական ճանապարհով ընտրված կառավարության (Սադիկ ալ Մահդիի գլխավորությամբ) տապալման համար։ Այս մասին տեղեկացրել է հարաֆրիկյան տեղեկատվական Independent Online պորտալը՝ հղում կատարելով Սուդանում սեփական աղբյուրներին։
Սուդանի գլխավոր դատախազ Փաջ ալ Հիբերը ձեւավորեց 1989 թվականի հունիսի 30-ի ռազմական հեղաշրջման (որը իշխանության բերեց ալ Բաշիրին) հետաքննության կոմիտե։ Կոմիտեի եզրակացությունները կդառնան զինվորական եւ քաղաքացիական անձանց դատական հետապնդման հիմքը՝ Սուդանի սահմանադրական կարգի տապալման մեղադրանքով։ «Եթե նախկին նախագահը մեղավոր ճանաչվի, նրան կսպառնա կամ մահապատիժ, կամ ցմահ բանտարկություն»,- նշում է պարբերականը։ Մեղադրանքը վաղեմության ժամկետ կամ որեւէ այլ սահմանափակում չունի։
Սուդանը 30 տարի կառավարած ալ Բաշիրը իշխանությունից հեռացվեց ապրիլի 11-ի հեղաշրջման ընթացքում, բազմամսյա բողոքի ակցիաներից հետո՝ երկրում ծանր տնտեսական իրավիճակի ֆոնին։ Նրա հեռանալուց հետո իշխանությունը երկրում իր ձեռքը վերցրեց Ռազմական խորհուրդը։ Սեպտեմբերին Սուդանում ստեղծվեց անցումային կառավարություն ընդդիմության թեկնածուներից, ինչպես նաեւ Ինքնիշխան խորհուրդ՝ զինվորական եւ քաղաքացիական ուժերից, որոնք պետք է երեք տարում իրականացնեն մի շարք արմատական քաղաքական ու տնտեսական վերափոխումներ, տեղեկացնում է ՏԱՍՍ-ը։
Դատավարությունը ալ Բաշիրի դեմ սկսվել է օգոստոսի 19-ին։ Նրան ներկայացվել են կոռուպցիայի, փողերի լվացման, ապօրինի ֆինանսական մեքենայությունների եւ արտասահմանյան հիմնադրամների հետ գործարքների, ահաբեկչության ֆինանսավորման եւ ցուցարարների սպանությունը սադրելու մեղադրանքներ։ Պետության նախկին ղեկավարին այդ մեղադրանքներով սպառնում է ավելի քան 10 տարվա բանտարկություն։ Այժմ ալ Բաշիրի դեմ, համաձայն հարավաֆրիկյան ԶԼՄ-ների, պատրաստվում է նոր դատավարություն՝ հակասահմանադրական գործունեության մեղադրանքներով։