Էդգար Շաթիրյանը տեղյակ չի պահել իր հրաժարականի մասին. Լիլիթ Մակունց
Կոռուպցիայի կանխարգելման հանձնաժողովի անդամ Էդգար Շաթիրյանը, ով այդ պաշտոնում ընտրվել է «Իմ քայլը» խմբակցության առաջադրմամբ, իսկ երեկ հրաժարական է տվել, իր այդ որոշման մասին նախապես չի տեղեկացրել «Իմ քայլը» խմբակցությանը: Այս մասին այսօր՝ նոյեմբերի 27-ին, ԱԺ-ում լրագրողների հետ զրույցում նշեց «Իմ քայլը» խմբակցության ղեկավար Լիլիթ Մակունցը:
«Մենք պոստ ֆակտում տեղեկացել ենք դրա մասին: Ես, իհարկե, ցավում եմ, որ պարոն Շաթիրյանին եղել են կաշկանդող հանգամանքներ Կոռուպցիայի կանխարգելման հանձնաժողովում իր մասնագիտական որակներն իրացնելու եւ կոռուպցիայի կանխարգելմանն ուղղված քայլեր ձեռնարկելու համար: Կարծում եմ՝ խորհրդարանի կողմից տրված մանդատը, որով նա ներկայացել էր հանձնաժողով, պետք է բավարար վստահություն եւ անկաշկանդվածություն հաղորդեր նրան՝ աշխատելու համար»,-ասաց Մակունցը:
Ինչ վերաբերում է Ստամբուլյան Կոնվենցիային, ոչ երեկ, ոչ այսօր Ստամբուլյան կոնվենցիան խորհրդարանի օրակարգում չկա, նշեց «Իմ քայլը» խմբակցության ղեկավարը:
«Ես որևէ կերպ չեմ պատրաստվում անդրադառնալ մի փաստաթղթի, որը դեռ չի հայտնվել Ազգային ժողովում»,-հավելեց նա՝ պատասխանելով հարցին՝ հնարավո՞ր է արդյոք, որ հանրային ճնշումն իր գործն արեց եւ փաստաթուղթը չեկավ ԱԺ:
Հիշեցնենք, որ Ստամբուլյան կոնվենցիայի վավերացման դեմ մի շարք ակցիաներ են տեղի ունեցել, կազմակերպվել են ստորագրահավաքներ: Օրերս էլ «Իմ քայլը» խմբակցության պատգամավոր Թագուհի Ղազարյանը չէր բացառել, որ Ստամբուլյան կոնվենցիան կարող է այդպես էլ չհայտնվել խորհրդարանի օրակարգում: