ՀՔԾ պետը չի շտապում խոսել Գևորգ Կոստանյանի նկատմամբ հետախուզում հայտարարելու մասին (Տեսանյութ)

Հատուկ քննչական ծառայության պետ Սասուն Խաչատրյանն առաջարկում է սպասել 48 ժամ, որից հետո քննարկել նախկին գլխավոր դատախազ Գևորգ Կոստանյանի նկատմամբ հնարավոր հետախուզում հայտարարելու հարցը:

Ավելի վաղ հաղորդվել է, որ քննչական մարմինը որոշել է մեղադրանք առաջադրել Գեւորգ Կոստանյանին եւ հաշվի առնելով այն, որ նա գտնվում է Հայաստանի սահմաններից դուրս, նրան ներկայանալու համար տրամադրել է 48 ժամ: Ի պատասխան՝ Կոստանյանը ԶԼՄ-ների միջոցով հայտարարել է, որ անպայման կվերադառնա, սակայն դա կանի ավելի ուշ:

Լրագրողների հետ զրույցում, պատասխանելով հարցին, թե ինչ տեղի կունենա, երբ Կոստանյանը չներկայանա նշված ժամանակահատվածում, Սասուն Խաչատրյանը հարցին հարցով պատասխանեց՝ հետաքրքրվելով, թե արդյոք հարցն ուղղած լրագրողն իրական է համարում Մոսկվայից 48 ժամում ժամանելու հնարավորությունը: Խաչատրյանի կարծիքն այդպես էլ հայտնի չդարձավ: Ընդ որում, Խաչատրյանը վստահեցրեց, որ կգործեն օրենքով:

Ինչ վերաբերում է հարցին, թե ինչու հենց այս պահին քննչական մարմինը որոշեց զբաղվել Կոստանյանի դեմ մեղադրանքի հարցով, Խաչատրյանը նշեց, որ մեղադրանք է առաջադրվում ոչ թե այն ժամանակ, երբ հարմար են գտնում, այլ բացառապես ապացույցների եւ փաստերի առկայության դեպքում:

Խաչատրյանը համաձայնեց այն մտքի հետ, որ շատ կասկածյալների եւ մեղադրյալների հաջողվել է խուսափել արդարադատությունից: «Իհարկե, դա խնդիր է»,- նկատեց Խաչատրյանը: Իսկ թե ով է մեղավոր, եւ կան արդյոք մեղավորներ ստեղծված իրավիճակում, Խաչատրյանը չմեկնաբանեց: ՀՔԾ պետը հաստատեց, որ Կոստանյանի նկատմամբ մեղադրանքները կապ ունեն ոստիկանության նախկին պետ Ալիկ Սարգսյանի գործի հետ, սակայն մեղադրանքի մանրամասներ չներկայացրեց: