Աշխատանքային խորհրդակցություն ոստիկանությունում. Արման Սարգսյանն անդրադարձել է ՃՈ-ում կոռուպցիայի խնդրին. (Տեսանյութ)
Նոյեմբերի 23-ին ճանապարհային ոստիկանությունում տեղի ունեցավ աշխատանքային խորհրդակցություն, որը վարում էր ոստիկանության պետի ժամանակավոր պաշտոնակատար Արման Սարգսյանը։
Ոստիկանությունից Operativ.am-ին հայտնում են, որ ողջունելով ներկաներին՝ Արման Սարգսյանը խոսեց ճանապարհային ոստիկանության ծառայության մասին։ Նա նշեց, որ ճանապարհային ոստիկանը պետք է լավ իմանա իր իրավունքներն ու պարտականությունները, քաղաքացիների հետ շփումներում լինի գրագետ ու բարեհամբույր, նաեւ վճռական՝ իրավախախտներ հայտնաբերելիս։
Ոստիկանության պետի ժամանակավոր պաշտոնակատարը կարեւորեց ճանապարհային ոստիկանության ու ոստիկանության մյուս ստորաբաժանումների սերտ համագործակցությունը եւ մատնանշեց դեպքեր ու հանցագործություններ, որոնք բացահայտվել են այդ համագործակցության շնորհիվ։
Արման Սարգսյանն անդրադարձավ նաեւ ճանապարհային ոստիկանությունում կոռուպցիայի եւ արատավոր երեւույթների խնդրին եւ նշեց, որ օրինախախտները հայտնաբերվում եւ ենթարկվում են պատասխանատվության։
Ծառայողական պարտականությունները բարեխիղճ կատարելու համար ոստիկանության պետի ժամանակավոր պաշտոնակատարի հրամանով ճանապարհային ոստիկանության մի խումբ ծառայողներ պարգեւատրվեցին մեդալով, կրծքանշաններով ու պատվոգրերով։
Խորհրդակցության ավարտին Արման Սարգսյանը շրջեց ճանապարհային ոստիկանությունում, ծանոթացավ խախտումների արձանագրման եւ օպերատիվ կառավարման կենտրոնների աշխատանքին։