Բացահայտվել է Լեռնահովիտ գյուղում կատարված գողության դեպքը
ՀՀ քննչական կոմիտեի Լոռու մարզային քննչական վարչության Ստեփանավանի քննչական բաժնում իրականացված քննչական գործողությունների արդյունքում բացահայտվել են Լեռնահովիտ գյուղում կատարված գողության մի շարք հանգամանքներ: Երկու անձ ձերբակալվել է:
Նախնական տվյալներով՝ 2019թ. նոյեմբերի 23-ին, Լոռու մարզի Լեռնահովիտ գյուղի բնակչից ոստիկանության Տաշիրի բաժին հաղորդում է ստացվել այն մասին, որ նույն օրը, ժամը 00:30-ից մինչեւ ժամը 02:30-ն ընկած ժամանակահատվածում առերեւույթ հանցագործություն կատարած անձիք, օգտվելով առանձնատան մուտքի դուռը չկողպված լինելու հանգամանքից, ապօրինի մուտք են գործել իրեն պատկանող առանձնատուն եւ հափշտակել չգալի չափերով՝ 105.000 ՀՀ դրամ կանխիկ գումար:
Դեպքի առթիվ ՀՀ ՔԿ Լոռու մարզային քննչական վարչության Ստեփանավանի քննչական բաժնում հարուցվել է քրեական գործ՝ ՀՀ քրեական օրենսգրքի 177-րդ հոդվածի 3-րդ մասի 1-ին եւ 1.1 կետերով:
Ձեռնարկված քննչական գործողությունների եւ օպերատիվ-հետախուզական միջոցառումների արդյունքում պարզվել են դեպքի մի շարք հանգամանքներ. ենթադրյալ հանցագործություն կատարած անձանց ինքնությունը, ովքեր Լոռու մարզի բնակիչներ են՝ ծնված 1999 եւ 1991թթ.: Վերջիններիս ձերբակալվել են:
Քննության տվյալներով՝ առերեւույթ հանցագործություն կատարած անձինք միմյանց հետ ձեռք բերված նախնական համաձայնությամբ, վերը նշված օրը եւ ժամանակահատվածում, օգտվելով առանձնատան առաջին հարկի մուտքի դռան չկողպված լինելու եւ տանտիրոջ քնած լինելու հանգամանքից՝ մուտք են գործել ներս եւ նախապես իրենց հետ վերցրած թղթից կպչուն ժապավենով զգուշորեն կապել են ննջասենյակում քնած տանտիրոջ բերանը, հափշտակել գումար եւ դիմել փախուստի:
Նախաքննությունը շարունակվում է: Միջոցներ են ձեռնարկվում՝ դեպքի հանգամանքների օբյեկտիվ, լրիվ եւ բազմակողմանի քննությունն ապահովելու ուղղությամբ: