Կրթության եւ գիտության ոլորտներում հայ-ինդոնեզական համագործակցությունը նոր թափ է ստանում. ԿԳՄՍ

ՀՀ ԿԳՄՍ նախարարի տեղակալ Արեւիկ Անափիոսյանն այսօր նախարարությունում ընդունել է Ինդոնեզիայի Հանրապետության պատվիրակությանը, որը մեր երկիր է ժամանել Հայաստանի գիտության եւ տեխնոլոգիաների հիմնադրամի (FAST) հրավերով՝ «Co-incubation and incubator» ոլորտում Հայաստանի փորձն ուսումնասիրելու նպատակով։ Նոյեմբերի 23-ից Հայաստանում գտնվող ինդոնեզական պատվիրակության կազմում այդ երկրի կառավարության ներկայացուցիչներն են, ինկուբացիոն ծրագրերի ղեկավարներն ու ստարտափերի հիմնադիրները:

Ողջունելով հյուրերին Երեւանում՝ ԿԳՄՍ նախարարի տեղակալ Ա. Անափիոսյանն արձանագրել է, որ երկկողմ համագործակցությունն իրականացվում է ՀՀ կրթության, գիտության, մշակույթի եւ սպորտի եւ Ինդոնեզիայի Հանրապետության հետազոտությունների, տեխնոլոգիաների եւ բարձրագույն կրթության նախարարությունների միջեւ հուլիսին ստորագրված համաձայնագրի շրջանակում։

Նա համառոտ ներկայացրել է կրթության եւ գիտության ոլորտներում Հայաստանում սկիզբ առած բարեփոխումների ընթացքն ու նպատակները՝ նշելով, որ խնդիր է դրված խորացնել բնագիտական առարկաների ուսուցումը, բարենպաստ պայմաններ ստեղծել ստարտափերի շարունակական զարգացման համար, գիտությունն ու հետազոտական աշխատանքը կապել բուհերի հետ։

Ա․ Անափիոսյանն անդրադարձել է նաեւ Հանրակրթության պետական չափորոշչի, առարկայական չափորոշիչների ու ծրագրերի վերանայման գործընթացին, խոսել է դպրոցականների համար իրականացվող մշակութային ծրագրերի կարեւորության մասին։

Հայաստանի գիտության եւ տեխնոլոգիաների հիմնադրամի (FAST) հիմնադիր տնօրեն Արմեն Օրուջյանն ազդարարել է, որ FAST-ը, որպես գլխավոր իրականացնող գործընկեր, արդեն սկսել է համագործակցության առաջին փուլը: Ծրագրի շրջանակում նախատեսվում են արագընթաց վերապատրաստման եւ փորձի փոխանակման ծրագրերը։ Արագ փոփոխվող աշխարհում նա նաեւ կարեւորել է առնվազն վեց տարին մեկ անգամ կրթական ռազմավարական ծրագրերի ու փաստաթղթերի վերանայման անհրաժեշտությունը։

Ինդոնեզիայի Հանրապետության հետազոտությունների, տեխնոլոգիաների եւ բարձրագույն կրթության նախարարության ներկայացուցիչ Ֆերրի Ռահմադանը, շնորհակալություն հայտնելով հյուրընկալության համար, հետաքրքրվել է, թե որքանով է արդարացված կրթության եւ գիտության նախարարության միավորումը մշակույթի եւ սպորտի ոլորտները համակարգող գերատեսչությունների հետ։ Նա խոսել է նաեւ մասնավոր հատվածի հետ բարձրագույն ուսումնական հաստատությունների համագործակցության եւ հնարավոր համատեղ ծրագրերի կարեւորության մասին։

Հյուրերին ներկայացվել է կրթական բարեփոխումների ոլորտում ԿԳՄՍ նախարարության ձեռնարկած քայլերն ու բարձրագույն կրթության եւ գիտության բնագավառում օրենսդրական նոր կարգավորումները։

Ինդոնեզական պատվիրակությունը հանդիպումների շարքը մեր երկրում կշարունակի մինչեւ դեկտեմբերի 2-ը։