Փոխվարչապետը առաջարկում է ՍԴ դատավորներին ևս մեկ անգամ ծանոթանալ վաղաժամ թոշակի գնալու վերաբերյալ նախագծին
Կառավարությունը մտածում է մեծացնել տեսչական մարմինների կարողությունները, որպեսզի նրանք կարողանան ոչ միայն գնալ հետևանքները արձանագրել և տուգանել, այլև կանխարգելել նման միջադեպերը: Այս մասին, այսօր՝ նոյեմբերի 20-ին, լրագրողների հետ զրույցում նշեց ՀՀ փոխվարչապետ Տիգրան Ավինյանը՝ անդրադառնալով փաստին, որ օրերս կրկին Ողջի գետը աղտոտվել էր:
«Մենք հասկանում ենք, որ սրանք ժառանգական խնդիրներ են, որոնք վաղ թե ուշ պետք է ի հայտ գային: Կարծում եմ, որ հանգիստ ու մեթոդական աշխատանքով հասնելու ենք մի նպատակի, որը կոչենք «պատասխանատու հանքարդյունաբերություն», ինչպես նաեւ հասկանանք, թե ինչպես կարող ենք վերականգնել տասնամյակների ընթացքում բնությանը հասցված վնասը»,-ասաց Ավինյանը:
Անդրադառնալով դիտարկմանը, որ ՍԴ անդամները այնքան էլ խանդավառված չեն վաղաժամ թոշակի գնալու վերաբերյալ նախագծին, անգամ հայտարարում են, որ իրենց համար դա վիրավորական է, փոխվարչապետը առաջարկում է ՍԴ դատավորներին ևս մեկ անգամ ծանոթանալ տվյալ նախագծին:
Հարցին,թե հնարավո՞ր է, որ իշխանությունները ՍԴ-ում առկա ճգնաժամը լուծելու համար գնա սահմանադրական փոփոխությունների ճանապարհով, Ավինյանը պատասխանեց. «Սահմանադրական փոփոխությունները հնարավոր է լինեն մեր օրակարգում, բայց չեմ կարծում, որ միայն այս մի լոկալ խնդրի լուծման հետ պետք է կապել սահմանադրական բարեփոխումները: Այդ բարեփոխումները պետք է անցնեն համալիր, ներառական եւ մասնակցային քննարկումներ, որ հասկանանք, թե որտեղ ունենք խնդիրներ եւ ինչ լուծումներ են առաջարկվում»:
Լրագրողներին հետաքրքրում էր նաեւ, թե երբ իշխանությունը հասկացավ, որ ՍԴ-ում կա ճգնաժամ, քանի որ սկզբում դրա մասին չէր խոսվում, նա պատասխանեց. «Չեմ կարող օր եւ ժամ արձանագրել, բայց փուլ առ փուլ այդ ճգնաժամը հասունացավ: Այդ ճգնաժամը ի սկզբանե սաղմում եղել է, որովհետեւ ՍԴ-ի նախագահի ընտրության հետ կապված հարցերը երբեւէ օրակարգից դուրս չեն եղել եւ չեն փարատվել, ինչպես նաեւ որոշակի հավելյալ տեղեկատվություն է ի հայտ եկել, որը կապված է այդ գործընթացի հետ»:
Նշենք, որ այդ օրինագծով առաջարկվում է ՍԴ անդամներին վաղաժամ հրաժարական տալ՝ պահպանելով իրենց աշխատավարձը, ապա նաեւ կենսաթոշակը:
Ինչ վերաբերում է Երևանում տրանսպորտի խնդրի լուծման հարցին, դրա համար արդեն, ըստ փոխվարչապետի, Կառավարությունն ունի հստակ հայեցակարգ:
Հարցին, թե երբ են Երեւանի քաղաքացիներն ազատվելու «մարշրուտկաներից», նա արձագանքեց. «Քաղաքապետարանն ունի հստակ ծրագիր, մենք ունեցել ենք երկու քննարկում քաղաքապետի, միջազգային դոնոր ընկերությունների, ֆինանսների նախարարության հետ: Կարծում եմ՝ որոշակի վերջնական լուծումները հասկանալի են մեզ համար:Կառավարությունն աջակցում է քաղաքապետարանին այս խնդրի լուծմանը հասնելու համար: Հուսով եմ, որ մոտակա 1-2-3 տարվա ընթացքում կկարողանանք ամբողջական լուծել տրանսպորտի հարցը մայրաքաղաքաում: Համոզված եմ, որ դա կբերի որակական ահռելի փոփոխության տրանսպորտի կազմակերպման առումով: