Նեթանյահուն մեկնաբանել է Սիրիայում իրանական օբյեկտներին հասցված հարվածները
Իսրայելի վարչապետ Բենիամին Նեթանյահուն հայտարարել է, որ Սիրիայում իրանական օբյեկտներին հասցված երկրի ՌՕՈՒ գիշերային հարվածը իսրայելական տարածքի գնդակոծման պատասխանն էր, եւ հավելել, որ իշխանությունները շարունակում են ապահովել պետության անվտանգությունը, փոխանցում է «ՌԻԱ Նովոստի»-ն:
«Ես հասկացրեցի, որ ով էլ մեզ վնաս պատճառի, նրան ցավոտ պատասխան հարված կհասցնենք: Մենք հենց այդպես վարվեցինք այսօր երեկոյան Սիրիայում «Ղուդս» իրանական ուժերի ռազմական թիրախների եւ սիրիական ռազմական օբյեկտների դեմ այն բանից հետո, երբ երեկ երեկոյան Իսրայելի վրա հրթիռներ էին արձակվել: Մենք իսրայելական անվտանգության ապահովման հարցում հաստատակամ կլինենք»,- նշված է հայտարարության մեջ, որը տարածել է Իսրայելի վարչապետի գրասենյակը:
Նախօրեին իսրայելական բանակի մամուլի ծառայությունը հայտնել էր, որ զինվորականները նշագրել են Սիրիայի կողմից իսրայելական տարածքի ուղղությամբ 4 հրթիռի արձակում, որոնք բոլորը որսվել են: Չորեքշաբթի լույս գիշերը Դամասկոսում տեղի են ունեցել պայթյուններ, Սիրիայի պետական հեռուստատեսությունը հայտնել է, որ ՀՕՊ-ն հետ է մղել մայրաքաղաքի եւ նրա արվարձանների վրա հարձակումը:
Զինվորականների հայտարարության մեջ նշված է, որ հարվածները հասցվել են մոտ 20 թիրախի, որոնց կեսից ավելին պատկանել է իրանական ուժերին: Թիրախներից մեկն էր Դամասկոսում օդանավակայանի մոտ տեղակայված շենքը, որտեղ, ինչպես պնդվում է, գտնվում է «Ղուդսի» կենտրոնակայանը: Հայտարարվում է, որ իսրայելական ուժերը այն դիտավորյալ չեն ավերել ամբողջությամբ:
Իրանը, լինելով երկիր, որի հիմնական կրոնը շիական իսլամն է, աջակցում է Լիբանանում «Հիզբոլլահ» շարժման դավանակիցներին, իրանցի զինվորականներ կան նաեւ Սիրիայում, սակայն, ինչպես նշում են Թեհրանում, Դամասկոսի խնդրանքով սիրիական կառավարական զորքերին խորհրդատվական օգնություն են ցուցաբերում ահաբեկիչների դեմ պայքարում:
Իսրայելցիներին ամենից շատ անհանգստացնում է իր հյուսիսային սահմաններին Իրանի ուժերի ներկայությունը: Իսրայելը հայտարարել է, որ հրեական պետությունը «հարյուրավոր անգամ» գործել է ընդդեմ Սիրիայում իրանական ռազմական ներկայության եւ պատրաստ է գործողությունները շարունակել: