Թուրքիայի գործողությունները Սիրիայի հյուսիս-արեւելքում կարող են հանգեցնել էթնիկական աղետի. Ասադ

Թուրքիայի գործողությունները Սիրիայի հյուսիս-արեւելքում կարող են հանգեցնել էթնիկական աղետի։ Դամասկոսը դեմ է Անկարայի նախաձեռնությանը՝ սիրիացի փախստականներին վերադարձնել թուրքական բանակին ենթակա տարածքներ, քանի որ դա համարում է պատրվակ գրոհայիններին իրենց ընտանիքներով այնտեղ վերաբնակեցնելու համար, ասել է Սիրիայի նախագահ Բաշար Ասադը ՌԻԱ «Նովոստի»-ի հարցազրույցում։

«Ոչ ոք չի հավատում, որ Թուրքիան ցանկանում է երեք միլիոն սիրիացի փախստական վերադարձնել այդ շրջան։ Դա հումանիտար ցուցանակ է պատրանք ստեղծելու համար։ Եթե անգամ ցանկանար դա անել, ապա դա անհեթեթություն է, չէ՞ որ իրադարձությունների այդպիսի զարգացումը կհանգեցնի կոնֆլիկտի հողի սեփականատերերի՝ տեղի քաղաքներում եւ գյուղերում ապրող մարդկանց, անշարժ գույքի եւ գյուղատնտեսական հողերի սեփականատերերի եւ վերաբնակների միջեւ, որովհետեւ այդ շրջանների օրինական բնակիչները չեն զիջի իրենց իրավունքները իրենց տարածքների հանդեպ։ Դա նշանակում է, որ նման կոնֆլիկտը կունենա էթնիկական բնույթ»,- ասել է Ասադը։

Նախագահի խոսքով՝ թուրքերի հիմնական նպատակն այդ հողեր ահաբեկիչներին բերելն է, որոնք գործել են ՍԱՀ տարածքում եւ ջախջախվել, իրենց ընտանիքների հետ միասին, որպեսզի ձեւավորեն նոր արմատականացված հասարակություն՝ «այն տեսլականին համապատասխան, որին կողմնակից է (նախագահ Թայիփ) Էրդողանի թուրքական ռեժիմը։ Սա է նրանց իրական նպատակը։ Համենայն դեպս, երկու տարբերակն էլ շատ վտանգավոր են եւ ուղղված են Սիրիայի ապակայունացմանը, ուստի մենք կտրականապես մերժում ենք դա»,- նշել է նա։