ՊԵԿ աշխատակիցներն ազատվել են սեփական դիմումի համաձայն. ՊԵԿ-ի պարզաբանումը
ՊԵԿ-ը պարզաբանում է տարածել կապված մամուլի հրապարակման հետ, ըստ որի գաղտնալսել են ՊԵԿ երկու աշխատակիցների և հեռացրել աշխատանքից:
Պարզաբանման մեջ, մասնավորապես, ասվում է.
«Ժամանակ» թերթի տեղեկություններով՝ աշխատանքից ազատված անձինք հանդիսացել են Արարատյան մաքսատուն-վարչության պետ եւ պետի տեղակալ, այնինչ, իրականում՝ նրանք պաշտոնավարել են տարբեր ստորաբաժանումներում:
Սեփական դիմումների համաձայն մաքսային ծառայությունից ազատված Զոհրաբ Ավետիսյանը զբաղեցրել է Արեւմտյան մաքսատուն-վարչության պետի տեղակալի, իսկ Գեղամ Սարմազյանը՝ Արարատյան մաքսատուն-վարչության պետի տեղակալի պաշտոնը: Գեղամ Սարմազյանը համակարգի հնաբնակներից է, աշխատանքային գործունեությունը սկսել է տեսուչից, այնուհետեւ երկար տարիներ զբաղեցրել է տարբեր պատասխանատու պաշտոններ:
Միաժամանակ հայտնում ենք, որ նշված անձանց հեռախոսային խոսակցությունները գաղտնալսելու եւ աշխատանքից ազատվելու հրամանը չեղյալ համարելու վերաբերյալ թերթի տվյալները եւս չեն համապատասխանում իրականությանը: Սեփական դիմումի համաձայն վերջիններիս ազատման հրամաններն արդեն ստորագրված են ՊԵԿ նախագահի կողմից»:
Հիշեցնենք, առավոտյան Operativ լրատվականը իր Մամուլի Տեսություն բաժնում հաղորդել էր, որ ինչպես գրում է «Ժամանակ» թերթը, նախորդ օրը աշխատանքից ազատվել են Արարատյան մաքսատան ղեկավար Զորիկ Ավետիսյանը և նրա տեղակալ՝ վարչապետ Նիկոլ Փաշինյանի վարորդի եղբայր Գեղամ Սարմազանյանը. Պատճառը հայտնի է, նրանց գաղտնալսել են: