Կատարյալ կլիներ, եթե բանակում ինքնասպանությունների կամ ինքնասպանությունների հասցնելու դեպքեր ընդհանրապես չլինեին, քանի որ մարդկային յուրաքանչյուր կյանքի փրկումը ծանր աշխատանք է. Գաբրիել Բալայան (Տեսանյութ)
Կատարյալ կլիներ, եթե բանակում ինքնասպանությունների կամ ինքնասպանությունների հասցնելու դեպքեր ընդհանրապես չլինեին, քանի որ մարդկային յուրաքանչյուր կյանքի փրկումը ծանր աշխատանք է: Այս մասին նոյեմբերի 11-ին ԱԺ-ում լրագրողների հետ զրույցում ասաց պաշտպանության փոխնախարար Գաբրիել Բալայանը:
Նրա խոսքով՝ ՊՆ-ում այդ երեւույթներին ծայրաստիճան բացասաբար են վերաբերվում, եւ այդ պատճառով մեղավորները միշտ պատասխանատվության են ենթարկվում: «Սակայն ցանկացած բանակում նման դեպքերից հնարավոր չէ խուսափել: Այսինքն, մարտական հերթապահություն իրականացնող ստորաբաժանումներում, ցավոք, գրեթե անհնար է լիարժեք պաշտպանություն ապահովելը: Ես դա թերություն եմ համարում, որի վրա պետք է աշխատել»,- հավելեց Բալայանը:
Փոխնախարարը պատասխանեց նաեւ փաստերի հնարավոր աղավաղման մասին հարցին: Նա, մասնավորապես, հայտարարեց, որ ՊՆ-ը կարող է միայն օգնել համապատասխան մարմիններին հետաքննության գործում, սակայն չի կարող միջամտել հետաքննության ընթացին, քանի որ դա հակաօրինական է եւ չի մտնում իր պարտավորությունների մեջ:
Միեւնույն ժամանակ, պաշտոնյան վստահեցրեց, որ բանակում ինքնասպանությունների աճ չկա: Ընդ որում, նա հավելեց, որ զինված ուժերում զինծառայողների հետ համապատասխան աշխատանքներ են տարվում, եւ եթե ոչ ստանդարտ պահվածք է նկատվում, զինծառայողին հավելյալ ուշադրություն է հատկացվում, նրա հետ հոգեբանական աշխատանք է տարվում, ժամանակավորապես հեռացվում է մարտական հերթապահությունից՝ անբարենպաստ միջադեպերից խուսափելու համար: