Ինչու է նման հակաիշխանական գործունեություն ծավալում «Սպուտնիկը»

Երկրորդ նախագահ Ռոբերտ Քոչարյանը «Սպուտնիկ Արմենիա» կայքում հրապարակված հոդվածում անդրադարձել է հայ-ռուսական հարաբերություններին, նաև նոր իշխանությունների կադրային քաղաքականությանը։Ազատազրկված նախկին նախագահի պնդմամբ՝ կառավարությունը և խորհրդարանական մեծամասնության միջուկը կազմված է ամերիկյան գրանտներով սնուցված մարդկանցից։

«Իշխանությունը լրատվական աջակցություն է ստանում բացառապես արևմտամետ դիրքորոշում ունեցող ԶԼՄ-ներից, որոնց առաջամարտիկը «Ազատություն» ռադիոկայանն է: Բոլոր իշխանամետ կուսակցությունները, քաղաքական գործիչները և ոչ կառավարական կազմակերպություններն ունեն ակնհայտ հակառուսական կողմնորոշում և, որպես կանոն, «նստած» են արևմտյան ֆինանսավորման վրա»,- գրել է նա։

Երևանի մամուլի ակումբի ղեկավար Բորիս Նավասարդյանը, «Առաջին լրատվական»-ի հետ զրույցում մեկնաբանելով երկրորդ նախագահի դիտարկումները, ասաց.

«Տարբեր ռուսական գործիչների և լրատվամիջոցների կողմից մենք տեսնում ենք քննադատության և Հայաստանից դժգոհությունների ծավալի մեծացում։ Հատուկ ընտրված թեմաներից մեկն այն է, որ Հայաստանի հասարակության վրա ազդեցություն ունեն տարբեր արևմտյան պետություններ ու կազմակերպություններ։ Քանի որ այդ ուղերձը մենք տեսնում ենք բազմաթիվ հրապարակումներում՝ ռուսական լրատվամիջոցներում և այսօրվա իշխանության դեմ հանդես եկող հայկական լրատվամիջոցներում՝ Ռոբերտ Քոչարյանն այդ բոլոր կարծրատիպերը, որոնք սիրված ու ընդունված են Ռուսաստանում, մանավանդ Ռուսաստանի դեսպանի վերջին հայտարարությունից հետո, հերթով շարադրում է»։

Նավասարդյանը տեսնում է երկու հիմնական նպատակ. «Առաջինը՝ հերթական անգամ վարկաբեկել ՀՀ իշխանություններին, երկրորդը՝ սիրաշահել Ռուսաստանի՝ Հայաստանին քննադատող քաղաքական շրջանակներին և իրենցից ակնկալելով աջակցություն իր հետ կապված բոլոր գործերում։ Սա առաջին անգամ չի արվում, և նոր առիթ է գտնվել դա կրկնելու համար»։

Մեր զրուցակիցն առանձնացրեց մեկ այլ կարևոր հանգամանք ևս. «Դա «Սպուտնիկ» գործակալության աշխատանքն է Հայաստանում։ Ի վերջո, դա Ռուսաստանի պետական լրատվամիջոցն է և, փաստորեն, Հայաստանում միանշանակ և հետևողականորեն հակաիշխանական բովանդակության տեղեկություններ է տարածում՝ և՛ հրապարակումների բովանդակությամբ, և՛ տարբեր կազմակերպությունների մամուլի ասուլիսների ու քննարկումների առումով։

Եթե վերլուծենք «Սպուտնիկի» վերջին ամիսների գործունեությունը, ապա մենք համարյա չենք տեսնի որևէ հրապարակում, որտեղ ՀՀ իշխանությունը դրական է երևում, կամ որևէ իշխանության ներկայացուցիչ, որը կդառնա իրենց քննարկումների հիմնական խոսնակը։ Դա բնականաբար պետք է գրավի ՀՀ իշխանությունների ուշադրությունը, և լինի համապատասխան արձագանք՝ ինչու է նման գործունեություն Հայաստանում ծավալում Ռուսաստանի պետական լրատվամիջոցը»։

Նյութի աղբյուրը՝ 1in.am