Կարագանդայում դատավճիռ է կայացվել զանգվածային ծեծկռտուքի մասնակիցների նկատմամբ, որին նաեւ հայեր են մասնակցել

Կարագանդայում դատավճիռ է կայացվել «Հին Հռոմ» ռեստորանում Ամանորի գիշերը տեղի ունեցած զանգվածային ծեծկռտուքի մասնակիցների նկատմամբ, հաղորդում է Tengrinews.kz-ը:

Դատարանի վճռով Յուսիֆ Նուրուլուն մեղավոր է ճանաչվել սպանության եւ խուլիգանության համար եւ դատապարտվել 19 տարվա ազատազրկման: Մյուս 12-ը մեղավոր են ճանաչվել խուլիգանության համար:

Սոխակ Մալխասյանին եւ Արմեն Խաչատրյանին դատարանն ազատել է քրեական պատժից: Եվս 6 մեղադրյալի՝ Թորգոմ Մալխասյանին, Խաչատուր Հովհաննիսյանին, Ժասուր Պիրովին, Քայիր Նադիրբեկովին, Դավիթ Գալկինին եւ Վասիֆ Նուրուլուին դատարանը դատապարտել է 4-4,6 տարվա ազատազրկման:

«Ամբաստանյալներ Իլյա Շչուրոկը, Տիգրան Ստեփանյանը, Արման Հովհաննիսյանն ու Բոլաթ Ժումամրատովը մեղավոր են ճանաչվել 293 հոդվածի 3-րդ մասի 2-րդ կետով եւ դատապարտվել 3 տարվա ազատազրկման»,- դատավորը հրապարակել է վճիռը:

Դատարանը վճռել է նաեւ բոլոր դատապարտյալներին պատիժը կրելուց հետո հարկադրաբար արտաքսել Ղազախստանի տարածքից եւ 5 տարի արգելել նրանց մուտքը Ղազախստան:

Դատարանը նաեւ բավարարել է տուժող կողմի քաղաքացիական հայցն ու Յուսիֆ Նուրուլուից 3 մլն տենգե բռնագանձել: Ավելի վաղ զոհվածի հայրը քաղաքացիական հայց էր ներկայացրել ավելի քան 30 մլն տենգեի չափով բարոյական եւ նյութական վնասի փոխհատուցման մասին: Նշվում է, որ որոշ դատապարտյալներ արդեն փոխհատուցել են իրենց մի մասը:

Հիշեցնենք, որ հունվարի 1-ին Կարագանդայում «Հին Հռոմ» ռեստորանի մոտակայքում զանգվածային ծեծկռտուք էր տեղի ունեցել, որի ժամանակ 23-ամյա տղա էր զոհվել: Եվս 3 մարդ դիմել էր հիվանդանոց դանակի հարվածներից ստացած վնասվածքներով: Քննչական մարմինների վարկածով՝ ռեստորանում Ամանորի գիշերը վիճաբանությունը սկսվել է լեզվակռվից: Հայտնի է, որ զոհված Ռախիմժան Ժանսեիտը ռեստորան է գնացել ընկերների զանգից հետո: Ընկերները նրանից օգնություն են խնդրել: Բախման արդյունքում նա վնասվածք է ստացել: Ամենաակտիվ հարձակվողների թվում են եղել Նարեկ Գուրույանն ու Յուսիֆ Նուրուլուն: Վերջինս դանակի մի քանի հարված է հասցրել Ռախիմժան Ժանսեիտին: Հարվածներից մեկը դիպել է նրա ծնկատակի զարկերակին, թոքերին: Տուժածը մահացել է առատ արնահոսությունից: Տեղի ունեցածից հետո ՀՀ քաղաքացի Նարեկ Գուրույանը լքել է Ղազախստանի տարածքն ու ձերբակալվել հունվարի 9-ին Օմսկի մարզում: Նրա նկատմամբ քրեական գործն առանձնացվել է առանձին վարույթում: