Այս տարի Գերմանիան ակնկալում է միգրանտներից ապաստան ստանալու ավելի քիչ թվով հայտեր

Ըստ կանխատեսումների՝ 2019 թվականին Գերմանիայում ապաստան ստանալու ավելի քիչ թվով հայտեր կներկայացվեն, քան անցյալ տարի, հայտնում է DW-ն:

Միգրացիայի եւ փախստականների գործերով դաշնային գերատեսչությունում (BAMF) ակնկալում են, որ մինչեւ տարեվերջ կներկայացվի 145 հազար դիմումից ոչ ավելի, հայտարարել է գերատեսչության ղեկավար Հանս-Էքարդ Զոմմերը Bild am Sonntag պարբերականի հետ հարցազրույցում, որը հրապարակվել է այսօր՝ նոյեմբերի 3-ին:

Ընթացիկ պահին ներկայացվել է Գերմանիայում ապաստան ստանալու մոտ 110 հազար դիմում: Չնայած թվերը 2018 թվականի համեմատությամբ նվազել են, Զոմմերը նշել է, որ նախկինի պես չափից ավելի շատ հայտեր են ստացվում: «Բոլոր միջնորդագրերի միայն 35-38 տոկոսն է հավանություն ստանում: Սա նշանակում է, որ Գերմանիա ժամանող մարդկանց գրեթե երկու երրորդը ապաստան ստանալու հիմնավորում չունի»,- ընդգծել է BAMF-ի ղեկավարը:

2017 թվականից գերատեսչությունն իրավունք ունի վերլուծելու միգրանտների բջջային հեռախոսների տեղեկությունները, եթե նրանց ծագման վերաբերյալ կասկածներ են առաջանում: Սակայն, ինչպես նշվում է Süddeutsche Zeitung պարբերականում, այս մեթոդն առանձնապես հաջողված չի եղել: 2018 թվականին գերատեսչությունը հասանելիություն է ստացել 11 400 մարդու տեղեկություններին, 3300 դեպքում կատարվել է ստացած տեղեկությունների մանրակրկիտ վերլուծություն: Սա օգնել է պարզել ապաստան հայցողների 33 տոկոսի ծագումը, եւ միայն 2 տոկոս դեպքում է պարզվել, որ միգրանտներն իրենց մասին կեղծ տեղեկություններ են տվել: Մեծ հաշվով, այս միջոցառումը ոչ մի օգուտ չի տվել:

Հանս-Էքարդ Զոմմերը հիշեցրել է, որ ապաստան հայցողների բջջային հեռախոսների տվյալների մշակման ժամանակ ստացած տեղեկությունները որոշ դեպքերում փոխանցվում են պետանվտանգության մարմիններին: BAMF-ի ղեկավարի խոսքով՝ ահաբեկչության դեմ պայքարի մեծ թվով հաջող գործողությունների անցկացումը հնարավոր է դարձել իր գերատեսչության փոխանցած տեղեկությունների շնորհիվ: «Ուստի BAMF-ն իրեն համարում է պետանվտանգության մարմին»,- նշել է Զոմմերը: