Հոգևոր խորհուրդը դեմ է «հայ եկեղեցու պատմություն» առարկայի դպրոցական ծրագրից հանելուն. Այդ մասին այսօր կասեն Վարչապետին «Հրապարակ»

«Հրապարակ» թերթը գրում է.

«Գերագույն հոգևոր խորհուրդը երկու օր շարունակ նիստ հրավիրելուց հետո այսօր կհանդիպի երկրի առաջին դեմքերին` վարչապետ Նիկոլ Փաշինյանին և ԱԺ նախագահ Արարատ Միրզոյանին, իսկ շաբաթ օրը` նախագահ Արմեն Սարգսյանին:

Հիշեցնենք, որ նախարար դառնալու հենց առաջին օրվանից Արայիկ Հարությունյանը հայտարարել էր, որ «եկեղեցու պատմություն» առարկան պետք է հանվի դպրոցական ծրագրից, սակայն հանդիպելով հասարակական հակազդեցությանը՝ առժամանակ «լռեցրին» հարցը։

Հիմա, ի վերջո, ԿԳՄՍ-ն որոշում է կայացրել, որ այդ առարկան հանվում է դպրոցական ծրագրերից, ներառվում հայոց պատմության ծրագրի մեջ: Արդյոք հոգևոր խորհրդի երկօրյա քննարկումների առարկան եղե՞լ է հայ առաքելական եկեղեցու պատմության նկատմամբ իշխանությունների մոտեցումը։

«Ոչ, հոգևոր խորհրդի երկօրյա նիստերի ընթացքում չենք քննարկել այդ հարցը, որոշել ենք հարցն այսօր ուղղել Փաշինյանին ու Միրզոյանին, թե ինչու և ինչպես կարելի է նման բան։ Չնայած` կարող է և չուղղենք, չլսենք իրենց, որովհետև խորհրդում առկա է պնդումը, որ հարցը միանշանակ պետք է դնել` առանց իրենց կարծիքը լսելու, որ հերիք ու բոլ եղավ, մենք դեմ ենք, և անթույլատրելի, հակաառաքելական է նման քայլը։ Չնայած խորհրդի կազմում այլ տեսակետ էլ կա, կան նաև կոմֆորմիստներ, որ գտնում են` կարելի է և այդպես»,- ասաց հոգեւոր խորհրդի մեր աղբյուրը:

Աշխարհականների՞, թե՞ հոգևորականների թվում են նրանք։ «Աշխարհականներ են՝ ՀՀՇ-ական իշխանությունների հետ ջերմ կապերի մեջ եղած»: Իսկ Վեհափա՞ռը։ «Վեհափառն իրեն անաչառ է պահում»:

Առավել մանրամասն՝ թերթի այսօրվա համարում: