Սա կաշկանդված, խեղճուկրակ բյուջե է. Վարդան Բոստանջյան
Հայաստանում ընտանիք, լեզու, հավատ, կրթություն կատեգորիաները մնում են դոմինանտ, եւ իմ մոտ տպավորություն է, որ սուտի ժողովրդավարները, լիբերալիստները, գլոբալիստները առաջադրանք ունեն այդ ամենը վերացնել եւ հասարակությանը զոմբիացնելու: Այս մասին այսօր՝ հոկտեմբերի 31-ին, լրագրողների հետ հանդիպման ժամանակ նշեց ԱԺ նախկին պատգամավոր Վարդան Բոստանջյանը:
«Այսինքն ի՞նչ լեզու, ինչ սոցիալական խնդիրներ, պարզապես մարդ արարածը գրաստի պես թող ապրի, դրան կառավարելը հեշտ է»,-ասաց նա:
Անդրադառնալով 2020 թվականի բյուջեի նախագծին, Բոստանջյանն ասաց, որ այն կաշկանդված, խեղճուկրակ բյուջե է, հավելելով, որ թե եկամուտների կտրվածքով, թե հարկեր/ՀՆԱ հարաբերակցության տեսանկյունից, կապիտալ ծախսերի առումով առաջընթաց չի տեսնում:
Փոխարենը Բոստանջյանը մի ոլորտում առաջընթաց տեսնում է. «Երիտասարդ մարդիկ, որ դեռ չեն հասցրել որեւէ մասնագիտության մեջ խորանալու, երկրներ տեսնելու, ոչ իրենց հաշվի հաճույքներ ստանալու առումով համապատասխան ծախսումներ իրականացնում են բյուջեից»: