Բանկային համակարգում գրեթե բոլոր ցուցանիշների մասով ունենք զգալի աճ. Հայաստանի բանկերի միության նախագահ
Այս տարվա 3-րդ եռամսյակում բանկային համակարգում ունենք դրական ցուցանիշներ. գրեթե բոլոր ցուցանիշների մասով ունենք զգալի աճ, որը շատ դրական ենք համարում եւ վստահ ենք, որ մինչեւ տարեվերջ այս ցուցանիշները կպահպանվեն եւ նույնիսկ կավելանան։ Այս մասին այսօր՝ հոկտեմբերի 30–ին, լրագրողների հետ հանդիպման ժամանակ նշեց Հայաստանի բանկերի միության նախագահ Մհեր Աբրահամյանը՝ ներկայացնելով ՀՀ բանկային համակարգի գործունեության հիմնական ցուցանիշները 2019 թվականի 3–րդ եռամսյակում:
Նրա խոսքով՝ բանկային համակարգում իրացվելիության ցուցանիշները բավական բարձր են. «Դրանց բարձր լինելը խոսում է քաղաքացիների եւ բիզնեսի վստահության մասին բանկային համակարգի նկատմամբ, ինչպես նաեւ բանկային համակարգը ունակ է եւ վստահորեն կարող է սպասարկել տնտեսությունը»,– ասաց Աբրահամյանը։
ՀԲՄ գործադիր տնօրեն Սեյրան Սարգսյանը ներկայացրեց համակարգի հիմնական ցուցանիշները եւ դրանց դինամիկան. ««Բանկային համակարգի ընդհանուր կապիտալը 9–րդ ամսվա վերջի դրությամբ կազմել է 818 միլիարդ դրամ, ակտիվները՝ 5 տրիլիոն 395 միլիարդ դրամ, վարկերը՝ 3 տրիլիոն 370 միլիարդ դրամ, պարտավորությունները 4 տրիլիոն 576 միլիարդ դրամ»,– ասաց Սարգսյանը։
Լրագրողների հարցին ավանդների վստահության հետ կապված ինչպիսի՞ դինամիկա է նկատվում, ՀԲՄ նախագահը պաըասխանեց. «Ավանդները նույնպես աճել են եւ ոչ միայն 3–րդ եռամսյակի ընթացքում։ Եթե վերջին տարիների դինամիկան նայենք մշտապես աճման միտում ունեն, որը խոսում է հասարակության վստահության մասին բանկային համակարգի նկատմամբ։ 90–ականների այն վատ դեպքերը բոլորս գիտենք, երբ բանկերը սնանկանում էին եւ մարդիկ կորցնում էին իրենց գումարները. Հայաստանում բանկի սնանկացման վերջին դեպքը, եթե չեմ սխալվում եղել է 17 տարի առաջ, որը խոսում է բանկային համակարգի կայունության մասին»։
Լրագրողները հետաքրքրվեցին նաեւ, թե որքանո՞վ են նորագույն տեխնոլոգիաներրը փոփոխություն մտցրել բանկային համակարգում եւ արդյոք ապագայում արհեստական բանականությունը կկիրառվի այս ոլորտում։
«Կարծում եմ, որ նոր տեխնոլոգիաների մուտքը կարող է լուրջ բովանդակային ազդեցուիթյուն ունենալ բանկային համակարգի գործունեության վրա եւ բանկերը հիմա տրանսֆորմացիայի փուլում են»,– ասաց սարգսյանը։
Մհեր Աբրահամյանի խոսքով՝ բանկերում նորագույն տեխնոլոգիաների գործածումը բարձրացումն է նաեւ արդունավետությունը։
«Սա անխուսափելի պրոցես է եւ բանկերը գնալու են դրան։ Նույն այդ մրցակցությունը խթանում է, որ բանկերը լինեն ավելի ինովացիոն, ավելի ակտիվ եւ ներդրումներ անեն տեխնոլոգիաներում, որովհետեւ, ի վերջո, նման ներդրումների նպատակը արդունավետության բարձրացումն է, ծախսերի նվազեցում կամ եկամուտների ավելացում»,– ասաց Աբրահամյանը։
Նրա խոսքով՝ արհեստական բանականության գործածումը Հայաստանի բանկային համակարգում եւս հնարավոր է եւ այն զուտ ժամանակի հարց է։