Սեքընդ հենդի վաճառողուհին 7 հազար դոլար գտավ բաճկոնի գրպանում եւ վերադարձրեց դրանք
Ինդիանայի նահանգի (ԱՄՆ) օգտագործված հագուստի խանութի աշխատակցուհին յոթ հազար դոլար է գտել բաճկոնի գրպանում և կարողացել գտնել դրա տիրոջը, տեղեկացնում է Lenta-ն՝ հղում կատարելով UPI-ին։
Ջենիֆեր Քայմսը պատմել է, որ վերջերս խանութ հանձնված բաճկոնի գրպանում ինչ-որ բան է շոշափել։ Ձեռքը տարել է բաճկոնի գրպանն ու այնտեղից փողերի կապ հանել։ Առաջին պահին կինը վախեցել է և փողը նորից հետ դրել։ Հետո նորից վերցրել է փողն ու կապվել խանութի տիրոջ հետ։
Քայմսն ընդգծել է, որ սեքընդ հենդ հանձնվող հագուստի գրպաններում երբեմն ծամոններ, լուսանկարներ և գնացուցակներ են լինում, բայց նման խոշոր գումար նա առաջին անգամ էր հայտնաբերում։
Քայմսի պետը՝ Թեմթ Վենդլենդը, օգնել է նրան գտնել բաճկոնի նախկին տիրոջն ու կապ հաստատել նրա հետ՝ փողը վերադարձնելու համար։ Պարզվել է, որ բաճկոնի տերը մոռացել է, թե ուր է դրել փողը։ Խանութի ներկայացուցիչների խոսքով՝ նա անսահման երախտապարտ էր։
Քայմսն ասել է, որ երջանիկ է, որ կարողացել է աշխատանքի մեջ բարի գործ կատարել։