ԱԱԾ տնօրենի ժամանակավոր պաշտոնակատար Էդուարդ Մարտիրոսյանը հերքել է մամուլի տեղեկությունները, թե առաջիկայում ԱԱԾ նախկին տնօրեն Արթուր Վանեցյանը կարող է ձերբակալվել
ԱԱԾ տնօրենի ժամանակավոր պաշտոնակատար Էդուարդ Մարտիրոսյանը հերքեց մամուլի տեղեկությունները, թե առաջիկայում ԱԱԾ նախկին տնօրեն Արթուր Վանեցյանը կարող է ձերբակալվել կամ կալանավորվել:
Հարցին, թե պետական վերահսկողական ծառայությունը ԱԱԾ-ում ինչ ստուգումներ է իրականացնում և արդյոք դա վերաբերում է Արթուր Վանեցյանի ղեկավարման տարիներին, նա պատասխանեց. «ՊՎԾ-ն իր հերթական ստուգումներն է իրականացնում, եւ կարծում եմ՝ առաջիկայում կլինի հրապարակում: Արթուր Վանեցյանի հետ դա կապված չէ, ուղղակի ՊՎԾ-ն իր գործառույթների շրջանակում ուսումնասիրում է ԱԱԾ գործունեությունը երևի թե 2 տարվա կտրվածքով»:
Հարցին, թե արդյոք ճիշտ են լուրերը, որ Արթուր Վանեցյանը կարող է ձերբակալվել, կալանավորվել, Էդուարդ Մարտիրոսյանը բացասական պատասխան տվեց. «Պետք չի այդպիսի ստահոդ լուրեր տարածել: Ով է տարածում, ի՞նչ ձերբակալության մասին է խոսքը»: նա հերքեց նաեւ լուրերը, թե Վանեցյանի հետ կապված գործ կա կամ հարուցվելու է»:
Հարցին, թե եթե իրեն առաջարկվի զբաղեցնել ԱԱԾ տնօրենի պաշտոնը, կհամաձայնի՞, Մարտիրոսյանը պատասխանեց. «Ոչ մի քննարկում չի եղել: Երբ առաջարկություն կլինի, այդ ժամանակ կխոսենք»:
Անդրադառնալով ՍԴ նախագահ Հրայր Թովմասյանի հարազատներին ԱԱԾ հրավիրելուն, Էդուարդ Մարտիրոսյանն ասաց, որ ոչ մի քաղաքական հետապնդման խնդիր չի եղել, և ենթատեքստ խնդրեց չփնտրել:
«Ուղղակի նյութերի նախապատրաստման ամբողջականությունն ապահովելու համար նաեւ խնդիր էր առաջացել լսել Հրայր Թովմասյանի մոտ ազգականներին՝ երկու դուստրերին եւ հորը: Ի դեպ, նրա երեխաները 23 եւ 25 տարեկան են: Խնդիրը կապված է եղել գույքի հետ, իրենց գույք է փոխանցվել, եւ մենք պարտավոր էինք պարզաբանում իրականացնել այդ հարցով՝ ամբողջականությունն ապահովելու համար»,-ասաց ԱԱԾ տնօրենի պաշտոնակատարը՝ հավելելով, որ խոսքն ապօրինի հարստացման մասին չէ:
Հարցին,թ ե ի՞նչ գործի շրջանակում էին հրավիրվել Թովմասյանի հարազատները, Էդուարդ Մարտիրոսյանը պատասխանեց. «Մենք դա հրապարակել ենք, մամուլում բավականին մանրամասն ներկայացրել, նույնիսկ նախաքննության շրջանում չպետք է այդքան ներկայացնեինք, որպեսզի սպառիչ լինի պատասխանը»:
Ինչ վերաբերում է նրան, թե արդյոք Հրայր Թովմասյանը ներգրավվելո՞ւ է այդ գործում, նա պատասխանեց. «Դեռեւս նախաքննություն է ընթանում: Մենք հրավիրել ենք իրեն, զանգել ենք: Ավելի շուտ ուզում էինք տեղեկացնել, որ մենք հրավիրելու ենք, ոչ հարցաքննության, սակայն ինքը հեռախոսազանգերին չի պատասխանել, հետագայում մեկնել է Մոսկվա, ՌԴ: Մենք այդտեղ ոչ մի բան չենք տեսնում, ուղղակի որպես բարի կամքի դրսեւորում ուզում էինք տեղեկացնել: Այդտեղ որեւէ քաղաքական ենթատեքստ պետք չի տեսնել»: