Ճապոնիայում թայֆունների պատճառած վնասը հասել է 1,5 մլրդ դոլարի

Այս աշնանը Ճապոնիային պատուհասած թայֆունների պատճառած վնասը հասել է 1,5 մլրդ դոլարի, հաղորդում է «ՌԻԱ Նովոստի»-ն:

Ճապոնիայի գյուղատնտեսության, անտառային եւ ձկնային տնտեսության նախարարության հաշվարկների համաձայն՝ սեպտեմբերին «Ֆաքսայ» թայֆունից հետո վնասը կազմել է 50,9 մլրդ իեն (468,2 մլն դոլար), իսկ հոկտեմբերին «Հագիբիս» թայֆունից հետո՝ 122,17 մլրդ իեն (ավելի քան 1,1 մլրդ դոլար):

Մասնավորապես, մոտ 33 հազար հեկտար տարածք է վնասվել եւ հեղեղվել:

Հեղեղների եւ սողանքների հետեւանքով զոհվել է 88 մարդ, եւս 7-ն անհետ կորած է համարվում, տուժածների թիվը գերազանցում է 400-ը:

Ճապոնիայի վարչապետ Սինձո Աբեն հայտարարել է, որ վերջին մի քանի տասնամյակների ընթացքում ամենաուժգին «Հագիբիս» թայֆունի հետեւանքները վերացնելու համար հավելյալ միջոցներ տրամադրելու մասին որոշում կընդունվի:

Նրա խոսքով՝ տեղական իշխանությունները չպետք է ռեսուրսների պակաս ունենան՝ ճանապարհները, կամուրջները, տները վերակառուցելու եւ աղետի գոտում նորմալ կյանքը վերականգնելու համար: