Հայաստանին և Բուլղարիային ուղիղ մշտական ավիահաղորդակցություն է անհրաժեշտ. Զախարիևա
Հայաստանին եւ Բուլղարիային ուղիղ մշտական ավիահաղորդակցություն է անհրաժեշտ: Այս մասին Երեւանում մամուլի ասուլիսի ժամանակ հայտարարեց Բուլղարիայի արտաքին գործերի նախարար Եկատերինա Զախարիեւան:
«Իմ առաջին այցն է Հայաստան, հուսով եմ, ոչ վերջին: Մենք խոսում ենք տարբեր լեզուներով, սակայն Բուլղարիան եւ Հայաստանն ընդհանրություններ ունեն, ինչը ձեւավորվել է պատմականորեն: Բուլղարիայում գրեթե 11 000 հայ է բնակվում: Եվ դա ավելի է մտերմացնում»,- նշեց նա:
Նրա խոսքով՝ Բուլղարիայում առաջին հայկական դպրոցը բացվել է 19-րդ դարի կեսերին, իսկ այժմ երկրում 8 դպրոց կա, որտեղ հայերեն են ուսուցանում, հայերեն կարելի է սովորել նաեւ համալսարաններում:
Սակայն երկու երկրների միջեւ տրանսպորտային հաղորդակցությունը բարդացնում է հարաբերությունների հաստատումը: «Այստեղ հասնելու համար 10 ժամ պահանջվեց, սակայն մենք այդքան մոտ ենք: Ուղիղ չվերթի դեպքում ընդամենը մի քանի ժամ կպահանջվեր»,- նշեց նախարարը: Նրա խոսքով՝ Բուրգասից եւ Վառնայից չարթերային չվերթներ են գործում, սակայն Երեւան-Սոֆիա ուղիղ չվերթ չկա: «Դժվար է պատկերացնել գործարարի, որը կճամփորդի 10 ժամ»,- խոստովանեց նախարարը:
Բացի այդ, նա հայտնեց, որ իր հայ գործընկերոջ հետ քննարկել են առեւտրային հարաբերությունների զարգացման հնարավորությունները: Զախարիեւան նշեց, որ 2019-ի առաջին 6 ամիսների ընթացքում առեւտրաշրջանառությունը կազմել է մոտ 20 մլն, սակայն, նրա խոսքով, դա քիչ է: Որպես համագործակցության ուղղություններ կողմերը դիտարկում են մեքենաշինությունը, սննդի արդյունաբերությունը, IT-ն, բժշկությունը: Նախարարի խոսքով՝ Բուլղարիայում ստարտափերի աջակցության համար ԵՄ հատուկ հիմնադրամներ են գործում, եւ կարելի է կազմակերպել դրանց մուտքը Հայաստան եւ տաղանդավոր երիտասարդության որոնումը: Նա հաստատեց Հայաստանի հետ ինչպես երկկողմ, այնպես էլ բազմակողմ ձեւաչափով համագործակցությունը զարգացնելու մտադրությունը: Այդ համատեքստում նախարարը նշեց, որ Բուլղարիայի աջակցությամբ Հայաստանում մի շարք ծրագրեր կիրականացվեն, եւ համագործակցությունն էլ ավելի կընդլայնվի:
Նշենք նաև, որ Հայաստանի և Բուլղարիայի կառավարությունների միջև ստորագրվել են երկու համաձայնագրեր: Փաստաթղթերը ստորագրվել են Երեւան Բուլղարիայի ԱԳ նախարար Եկատերինա Զախարիեւայի պաշտոնական այցի շրջանակում:
Համատեղ մամուլի ասուլիսում Հայաստանի ԱԳ նախարար Զոհրաբ Մնացականյանը նշեց, որ երկու երկրների հարաբերությունները հիմնված են բազմադարյա կապերի վրա, իսկ հայ համայնքի պատմությունը սկսվում է 5-րդ դարից: «Բուլղարիայի հայ ազգային հերոսները (Անդրանիկ Օզանյանը եւ Նժդեհը – խմբ.) ակտիվորեն մասնակցել են բուլղար ժողովրդի ազատագրական պայքարին եւ բարձր պարգեւների են արժանացել»,- նշեց նախարարը: Նրա գնահատմամբ՝ հարաբերությունները բազմաշերտ են, դրանք զարգանում են ինչպես երկկողմ, այնպես էլ բազմակողմ ձեւաչափով:
ԱԳ նախարարը հիշեցրեց, որ Բուլղարիան Հայաստան-ԵՄ համաձայնագիրը վավերացրած 16 երկրների թվում է: Նրա խոսքով՝ տնտեսական հարաբերություններն ակտիվորեն զարգանում են, բայց գործընթացն անբավարար է: Նախարարը նաեւ ընդգծեց միջկառավարական հանձնաժողովների եւ պատգամավորական բարեկամության խմբերի աշխատանքի կարեւորությունը:
Բուլղարացի նախարարի այցի շրջանակում 2 երկրների կառավարությունների միջեւ ստորագրվել է ուղեւորների եւ բեռների փոխադրման մասին համաձայնագիր (փոխարինել է 1995 թվականի պայմանագրին) եւ հետընդունման մասին համաձայնագիր:
«Քննարկել ենք տարածաշրջանային եւ միջազգային հարցեր: Ես ներկայացրեցի Լեռնային Ղարաբաղի հակամարտության կարգավորման գործընթացը»,- նշեց ՀՀ ԱԳ նախարարը:
Երևանում մամուլի ասուլիսի ժամանակ Բուլղարիայի ԱԳՆ ղեկավար Եկատերինա Զախարիեւան իր հերթին հայտարարեց, որ Բուլղարիան աջակցում է վիզային ռեժիմի ազատականացման հարցով Հայաստանի և ԵՄ-ի միջև երկխոսությանը: Նրա խոսքով՝ Բուլղարիան կողմ է նման երկխոսության մեկնարկին և դրա հաջող առաջընթացին:
Կարևոր քայլերից մեկը, նրա խոսքով, իր այցի շրջանակում Հայաստանի և Բուլղարիայի միջեւ ռեադմիսիայի մասին փաստաթղթի ստորագրումն է: