Կանադայի խորհրդարանական ընտրություններում պարտված պատգամավորները կստանան 11,5 հազարական դոլար
Կանադայի խորհրդարանի Համայնքների պալատի անդամները, որոնք հոկտեմբերի 21-ին անցկացված խորհրդարանական ընտրություններում չեն կարողացել վերընտրվել ստորին պալատ, որպես փոխհատուցում դաշնային բյուջեից կստանան 15 հազարական կանադական դոլար (11,5 հազար դոլար), հայտնում է CBC-ն:
Այսպիսի գումար կվճարվի խորհրդարանի նախկին 48 անդամների, որ դյուրացվի «խորհրդարանական գործունեությունից հետո նրանց վերադարձը սովորական քաղաքացու կյանքին»: Ընտրություններում պարտված 48 ժողովրդական ընտրյալներից 29-ը վարչապետ Ջասթին Թրյուդոյի իշխող Լիբերալ կուսակցության անդամներն են:
Հոկտեմբերի 21-ին Լիբերալ կուսակցությունը հաղթել էր խորհրդարանական ընտրություններում: Ըստ Ընտրական հանձնաժողովի տվյալների՝ լիբերալները հաղթել են 338 ընտրական տարածքներից 157-ում՝ ստանալով ձայների 33,1 տոկոսը: Պահպանողական կուսակցությունը հաղթել է 121 տարածքում (34,4 տոկոս), երրորդ տեղում է «Քվեբեկյան դաշինքը» (հաղթել է 32 տարածքում, 7,7 տոկոս), այնուհետեւ հաջորդում են Նոր դեմոկրատական կուսակցությունը (հաղթել է 24 տարածքում, 15,9 տոկոս) եւ Կանադայի «կանաչների» կուսակցությունը (հաղթել է 3 տարածքում, 6,5 տոկոս), մեկ մանդատ է ստացել անկախ թեկնածուն:
Մեծամասնության կառավարություն ձեւավորելու համար լիբերալներին անհրաժեշտ էր 170 մանդատ: Թրյուդոն արդեն հայտարարել է, որ խորհրդարանական կոալիցիա չի կազմի ընդդիմադիր կուսակցություններից ոչ մեկի հետ: Վարչապետը նոր կառավարության կազմը կհրապարակի նոյեմբերի 20-ին: