«Այդ հանցագործությունը քաղաքական շուկայի խաղաքարտ դարձնելը ցինիզմ է». Լարիսա Ալավերդյան
«Եթե Հունանյանը գիտի մի բան, որը թաքցնում է դատաիրավական համակարգից, նրան կրկին պատիժ է հասնում», այս մասին երեկ` հոկտեմբերի 27-ին, լրագրողների հետ զրույցում ասել է ՀՀ նախկին ՄԻՊ Լարիսա Ալավերդյանը:
«Պետք է հմուտ քննիչներ լինեն, որոնք հստակեցնեն, թե այդ ինչ մի բան ունի ասելու... Դա հանցագործություն է եւ այն քաղաքական շուկայի խաղաքարտ դարձնելը ցինիզմ է: Արդյո՞ք այդքան դաժան եւ ցինիկ հանցագործություն կատարողին ես պետք է հավատամ եւ եթե նա առեւտրի մեջ է մտնում, արդյոք դրա նպատակն ընդամենը ազատության մեջ հայտնվելը չէ»,-ասել է Լարիսա Ալավերդյանը:
Ըստ իրավապաշտպանի՝ դրա փոխարեն կարող են վերանայել զինծառայակից ընկերներին սպանելու մեջ մեղադրվող անձանց գործերը, որոնք Գագիկ Ջհանգիրյանի ժամանակ են քննվել:
«Պարտադիր է մենք ունենանք հենց այս ծանր հանցագործությունը, դուք մոռացե՞լ եք այն կադրերը, որոնցից երեւում է, թե ինչպես է արդեն սպանած վարչապետին վերաբերվում Հունանյանը: Ես պետք է հավատա՞մ նրա խոսքին, դա որեւէ հավատ չի ներշնչում ինձ եւ շատ-շատերին»,- ասել է Ալավերդյանը: Մարդու իրավունքների նախկին պաշտպանը նշեց, որ տարիներ առաջ, երբ ինքը հանդիպել է Նաիրի Հունանյանին, նա իրեն այնպես էր պահում, կարծես հերոսություն է արել:
Հիշեցնենք, որ 20 տարի առաջ տեղի ունեցած ոճրագործության հետեւանքով զոհվեցին ՀՀ ԱԺ նախագահ Կարեն Դեմիրճյանը, ՀՀ վարչապետ Վազգեն Սարգսյանը, ԱԺ փոխնախագահներ Յուրի Բախշյանը եւ Ռուբեն Միրոյանը, ԱԺ պատգամավորներ Արմենակ Արմենակյանը, Հենրիկ Աբրահամյանը, Միքայել Քոթանյանը եւ օպերատիվ կառավարման հարցերով նախարար (փաստացի իրականացրել է փոխվարչապետի գործառույթներ) Լեոնարդ Պետրոսյանը:
Զինված անձինք էին Նաիրի Հունանյանը, Կարեն Հունանյանը, Էդուարդ Գրիգորյանը, Վռամ Գալստյանը, Դերենիկ Բեջանյանը:
Հոկտեմբերի 27-ի ոճրի պարագլուխը Նաիրի Հունանյանն էր: Հետագայում Նաիրի Հունանյանը ցուցմունք տվեց և հայտարարեց, թե ինքը պետական մակարդակով ահաբեկչական ծրագրեր է ունեցել 1991 թվականին, բայց հանգամանքների բերումով չի կարողացել իրագործել:
Նշենք, որ «հոկտեմբերի 27-ի» գործով դատավճիռը հրապարակվել է 2003 թվականի դեկտեմբերի 2-ին:
Կենտրոնի դատարանի վճռով՝ 6 անձ դատապարտվել է ցմահ, մեկ անձ՝ 14 տարվա ազատազրկման: