Կառավարությունը շրջանառության մեջ է դրել համայնքների խոշորացման նախագիծ, սակայն, այս դեպքում էլ համայնքների լսված լինելու իրավունքը անտեսվում է

Կառավարությունը շրջանառության մեջ է դրել մի քանի համայնքների խոշորացման նախագիծ։ Ավելի վաղ ԱԺ «Իմ քայլը» խմբակցության պատգամավոր Վարազդատ Կարապետյանը Առաջին Լրատվականի հետ զրույցում ասել էր, որ առաջիկայում Արարատի ու Արմավիրի մարզում քննարկումներ կսկսվեն՝ հասկանալու համար, թե խոշորացումը, միավորումը որ մոդելով է իրականացվելու։ «Հիմա մենք քննարկում ենք տարբերակներ, որոնցից մեկը նախկին խորհրդային շրջանների ձևով միավորումն է։ Այսինքն՝ խոշորացվող միավորները պետք է լինեն ավելի խոշոր, որպեսզի կարողանան լիարժեքորեն կատարեն իրենց պատվիրակված ծառայությունները»,- ասել էր Կարապետյանը:

Համայնքների միության նախագահ Էմին Երիցյանի խոսքերով, սակայն, այս դեպքում էլ համայնքների լսված լինելու իրավունքը կրկին անտեսվում է։ «Կրկին հաշվի չեն առնվում սահմանադրական պահանջները և Տեղական ինքնակառավարման եվրոպական խարտիայի պահանջները։ Մեր բանավեճը նախկին իշխանությունների հետ այս հարցի շուրջ էր, մենք Հայաստանի վարչատարածքային փոփոխությունների բովանդակության մասին չենք խոսում, այլ սահմանադրական իրավունքների և նորմերի պահպանման։

Այսպես, ՀՀ Սահմանադրություն․

Հոդված 190. Համայնքների միավորումը և բաժանումը

….Ազգային ժողովը համապատասխան օրենք ընդունելիս (համայնքներ միավորելիս կամ բաժանելիս) պարտավոր է լսել այդ համայնքների կարծիքը։

Հոդված 180. Համայնքը

Համայնքը մեկ կամ մի քանի բնակավայրերի բնակիչների հանրություն է։ Այդպիսով, նախքան որևէ «խոշորացում», նախ, ՀՀ ԱԺ-ն պետք է սահմանի մեխանիզմները և ընթացակարգը սահմանադրական այս նորմի իրագործման համար։

Ինչը նշանակում է փոփոխություններ «ԱԺ կանոնակարգ» օրենքում»,-կարծում է Երիցյանը։ Նրա խոսքերով՝ նախորդ իշխանությունների իրականացրած վերջին 2 փուլերով խոշորացումները տեղի են ունեցել ՀՀ Սահմանադրության խախտմամբ․

«Այդ մասին ես հրապարակային խոսել եմ նախկինում և հեղափոխությունից հետո։ Ի դեպ, նման կերպ օրենք ընդունելու դեպքում, համայնքները օրենքի ընդունումից հետո 1 տարվա ընթացքում իրավունք ունեն դիմել Սահմանադրական դատարան։ Նախորդ իշխանությունների օրոք ոչ մի խոշորացվող համայնք այդ համարձակությունը չունեցավ»։

Երիցյանի խոսքերով՝ անցած տարիներին, նաև հեղափոխությունից հետո Համայնքների միությունը պատրաստել է բազմաթիվ մասնագիտական ու իրավական վերլուծություններ այս հարցի վերաբերյալ՝ ներգրավված են եղել նաև Եվրոպայի խորհրդի փորձագետները։ Իրենք առաջարկել են իրենց օժանդակությունը օրենսդրական փոփոխություններ մշակելու հարցում։ Դրանք տրամադրվել են նաև այսօրվա իշխանություններին, քննարկումներ են ունեցել նաև ԱԺ-ում․ «Այսպիսով, ինչով է տարբերվում ներկա կառավարության քաղաքականությունը այս ոլորտում նախկին իշխանության մոտեցումներից, եթե նույն կերպ անտեսվում է համայնքների լսված լինելու իրավունքը»։

Նկատենք, որ նախորդ իշխանության ժամանակ նույնիսկ խոշորացման գործընթացին աջակցած միջազգային կազմակերպություններն էինք արձանագրել, որ խոշորացման գործընթացը եղել է առանց բնակչության կարծիքը հաշվի առնելու։

Ինչ վերաբերվում է արդեն իսկ խոշորացված համայնքներին, որտեղ առկա է դժգոհություն, Վլադիմիր Կարապետյանը մեզ հետ զրույցում ասել էր, որ իրենք աշխատում են օրենսդրական փաթեթի վրա, որը վերաբերում է համայնքների լսելիությանը։ «Մինչև մենք համայնքի հետ չաշխատենք, և համայնքի ձայնը լսելու հստակ մեխանիզմներ չլինեն, մենք չենք գնա խոշորացման գործընթացին։ Ինչ վերաբերում է արդեն միավորված համայնքներին, ապա եթե դրանք կբավարարեն այն չափանիշներին, որոնք մենք հիմա մշակում ենք համայնքների միավորման համար, ապա այդ համայնքները կմնան իրենց ստանդարտներում։ Իսկ եթե չեն համապատասխանի, ապա տեղի կունենան շտկումներ։ Օրինակ՝ Նոյեմբերյանի հատվածում, Եղեգնաձորի հատվածում մենք ունենք խնդիրներ, որոնք պետք է շտկվեն»,- ասել էր Կարապետյանը։

Նյութի աղբյուրը՝ 1in.am