Նաիրի Հունանյանի վաղաժամկետ ազատման մասին Տոնոյանը լսել անգամ չի ցանկանում
«Ես առաջին շահագրգռվածն եմ, որ «Հոկտեմբերի 27-ի» գործը բացահայտվի, եթե դեռևս չի բացահայտվել և եթե կան անձինք, որոնք ուղղորդել են»,- այսօր՝ հոկտեմբերի 27-ին, «Եռաբլուր» պանթեոնում ասել է պաշտպանության նախարար Դավիթ Տոնոյանը՝ պատասխանելով Հոկտեմբերի 27-ի գործի վերաբացման անհրաժեշտության մասին հարցին։
«Հիմա դատապարտված մարդիկ կան։ Դատաքննությունն այնքանով, որ ավարտվել է, համարում եմ ավարտված, մնացած խնդիրների վերաբերյալ ես հիմա խոսել չեմ կարող։ Եթե ժամանակի ընթացքում նոր փաստեր ի հայտ գան, միգուցե փոփոխություն կատարվի։ Ժամանակի խնդիր է, հնարավոր չի՝ չբացահայտվի», ասել է Դ.Տոնոյանը, ավելացնելով, որ նման հանցագործություններ են եղել, որոնք բացահայտվել են 40-50 տարի հետո ։
Նաիրի Հունանյանի վաղաժամկետ ազատման մասին Տոնոյանը լսել անգամ չի ցանկանում։
Դավիթ Տոնոյանը «Եռաբլուրում» պատասխանել է նաև իր պաշտոնանկության վերաբերյալ շրջանառվող լուրերի մասին հարցին: «Եռաբլուր» զինվորական պանթեոնում լրագրողները պաշտպանության նախարարից հետաքրքրվել են իր պաշտոնանկության վերաբերյալ շրջանառվող լուրերով։ Հարցին՝ ի՞նչ հիմքեր ունեին իր հրաժարականի մասին լուրերը, արդյոք այդպիսով տրամադրություններ էին ստուգում, Դավիթ Տոնոյանը պատասխանել է․ «Երևի»։
Պաշտպանության նախարարը շեշտել է, որ իր ազատման մասին չի ցանկանում մտածել․ «Ես չեմ ուզում մտածել այդ մասին որպես պաշտոնյա, որը անվտանգության և պաշտպանության խնդիրներով է զբաղված, ասեկոսեներով և սպեկուլյացիաներով ես ժամանակ չունեմ զբաղվելու»։
Դավիթ Տոնոյանի խոսքով՝ իր և վարչապետի միջև հակասություններ չկան։