Բացվել է աշխարհում առաջին «գարեջրով ֆիթնեսը»
Գարեջրագործ եւ Bull Falls գարեջրագործարանի (Ուոսաու, Վիսքոնսինի նահանգ) սեփականատեր Մայք Զամզովն անցած շաբաթ իր գործարանում բացել է գարեջրով կարդիո- եւ յոգայի սրահներ։ Նա կարծում է, որ մարզումները եւ գարեջուրը պարզապես win-win են, փոխանցում է «Վեստի»-ն։
Մայքի խոսքով՝ գաղափարը հենց այնպես չի ծնվել։ Նա կարդացել է այն մասին, որ չափավոր խմող մարդիկ ֆիզիկական վարժություններով զբաղվելու ավելի շատ հակում ունեն, քան սթափության սիրահարները։
Ի վերջո, նա իր աչքով է տեսել գարեջրի եւ սպորտի համադրության բոլոր հաջողությունները, երբ Bull Falls-ի 5 կիլոմետրանոց բարեգործական վազքը (գարեջրով բոլոր մասնակիցների համար) հեշտությամբ հավաքել է 17 հազար դոլար «Never Forgotten Honor Flight» վետերանական ծրագրի համար։
Զամզովը նաեւ կարծում է, որ գարեջրի շուրջ հավաքույթները ֆիթնեսից հետո կօգնեն սկսնակներին ձգվել եւ չթողնել պարապմունքները։ «Դա բնավ նույնը չէ, ինչ մարզումներից հետո արագ տներ ցրվելը. ոմանք արդյունքում այդպես էլ չեն գալիս հաջորդ պարապմունքին՝ զգալով, որ ոչ մեկին այնտեղ պետք չեն։ Այլ բան է, երբ դուք սրահից հայտնվում եք հենց բարում, որտեղ ծանոթանում եք բոլորի հետ եւ ձեռք բերում աջակցող խումբ։ Գիտական հետազոտություններն արդեն ցույց են տվել, որ հասակակիցների դրական «ճնշումը» վարժությունները շարունակելու լավ դրդիչ է»։
Դեր է խաղում նաեւ տոնի գործոնը։ Հաճախ մարզական թիմերն իրենց հաղթանակները նշում են հենց բարում։ Բայց իրականում մարզական հաղթանակները պարտադիր չեն, կարելի է պարզապես տոնել հաղթանակն ինքդ քո հանդեպ, քո ծուլության եւ իներտության հանդեպ՝ այդ զգացողությունն ամրապնդելով մի շիշ լավ գարեջրով։ Ի դեպ, նման մոտեցմանը համաձայն են Հյուսթոնի համալսարանի վարքային նյարդաբանության ամբիոնի գիտնականները։
Ընդհանուր առմամբ, հայտնի են ալկոհոլի չափավոր օգտագործման ոչ քիչ առավելություններ սրտի խնդիրների համար։ Ամեն օր մեկ գավաթ գինին ներառված է միջերկրածովյան սննդակարգում, որը շատ բժիշկներ խորհուրդ են տալիս պացիենտներին որպես առողջ սնունդ։ Որոշ հետազոտություններ գարեջուրն անգամ դիտարկում են որպես սպորտային ըմպելիքի այլընտրանքային տեսակ (եթե դրան ավելացվի նատրիում եւ իջեցվի ալկոհոլի պարունակությունը)։
Գոյություն ունի նաեւ տեսություն, որ ալկոհոլը եւ ֆիզիկական վարժություններն ազդում են ուղեղի նույն ուղիների վրա։ «Մեզ հայտնի են բազմաթիվ զուգահեռներ, թե ինչպես է ուղեղն արձագանքում մարզումներին եւ ալկոհոլին,- ասում է Հյուսթոնի համալսարանի աշխատակից Լի Լիզերը։- Օրինակ, երկու դեպքում էլ ուղեղը շռայլորեն դոֆամին եւ էնդորֆիններ է արձակում»։
Այլ բան է, երբ ցանկացած առավելություններ վերաբերում են միայն սպիրտայինի չափավոր օգտագործմանը։ Որոշակի սահմանն անցնելիս ալկոհոլի եւ սպորտի ուղիները բաժանվում են։