Խաչատուրյան քույրերի նկատմամբ խափանման միջոցը երկարաձգվել է

Մոսկվայի քաղաքային դատարանը մինչեւ դեկտեմբերի 28-ը երկարաձգել է իրենց հոր սպանության մեջ մեղադրվող Խաչատուրյան 2 քույրերի նկատմամբ խափանման միջոցը՝ որոշակի գործողությունների արգելքի տեսքով, հաղորդում է ՏԱՍՍ-ը:

«Միջնորդությունը բավարարել, երկարաձգել խափանման միջոցը որոշակի գործողությունների արգելքի տեսքով մինչեւ դեկտեմբերի 28-ը»,- ասվում է դատարանի որոշման մեջ:

Դատարանը որոշումը կայացրել է փակ ռեժիմով: Երկարաձգվել է բնակության վայրը լքելու եւ միմյանց հետ շփվելու արգելքը:

Քույրերին մեղադրանք է առաջադրվել վերջնական խմբագրմամբ ՌԴ ՔՕ 105-րդ հոդածի երկրորդ մասով՝ «Մի խումբ անձանց կողմից նախնական դվադրությամբ սպանություն»: Միեւնույն ժամանակ, մեղադրանքի մեջ նշվում է, որ աղջիկների գործողությունները հրահրվել են իրենց հոր՝ Միխայիլ Խաչատուրյանի գործողություններով: Փաստաբանները պնդում են, որ աղջիկներն իրենց գործողություններն իրականացրել են անհրաժեշտ ինքնապաշտպանության շրջանակում, քանի որ նրանց հայրը երկար տարիներ բռնության է ենթարկել նրանց: Մեղադրյալներն ու նրանց պաշտպանները ծանոթանում են 30 հատորանոց քրեական գործի հետ:

Հիշեցնենք, որ Միխայիլ Խաչատուրյանի դին հայտնաբերվել էր հուլիսի 27-ի երեկոյան Մոսկվայի Ալտուֆեւսկի խճուղում բազմաթիվ կտրած-ծակած վերքերով։ Ըստ քննության տվյալների՝ նրան սպանել են երեք դուստրերը անձնական հակակրանքի հողի վրա։ Աղջիկները հարցաքննության ժամանակ խոստովանել են մեղքը եւ պարզաբանել, որ հայրը երկար ժամանակ «բարոյական տառապանքներ» է պատճառել։ Օգոստոսի 2-ին Մոսկվայի Օստանկինսկի դատարանը նրանց կալանավորել էր: Սեպտեմբերի 27-ին Բասմանի դատարանը փոփոխել էր նրանց նկատմամբ խափանման միջոցը որոշակի գործողությունների արգելքի տեսքով, որից հետո նրանք ազատ էին արձակվել: Ընտրված խափանման միջոցի համաձայն՝ աղջիկները չեն կարող լքել բնակության վայրն առանց քննիչի թույլտվության: