International Large Urban Parks Awards մրցանակաբաշխությունը՝ Կազանում (Լուսանկար)
Կազանում հոկտեմբերի 18-20-ը անցկացված Այգիների համաշխարհային կոնգրեսի՝ World Urban Parks-2019-ի գործնական ծրագրի հանգուցալուծումը դարձավ International Large Urban Parks Awards միջազգային մրցանակը, որը շնորհվում է այգիների և հասարակական տարածքների զարգացման մեջ ներդրումների համար։ Ռուսական երկու այգիներ՝ Կազանի քաղաքային «Լեբյաժյե» անտառտնտեսությունը և «Կրասնոդար» այգին, որը ստեղծվել է Սերգեյ Գալիցկու նախաձեռնությամբ, մրցանակներ են ստացել Eurasian Park Awards անվանակարգում։
«Կրասնոդարի այգին հետխորհրդային տարածաշրջանում վերջին տասնամյակում ստեղծված լավագույն նախագծերից մեկն է։ Եվ ամենահաճելին այն է, որ այգին ստեղծվել է հովանավորի փողերով, մեկ կոնկրետ մարդու ուժերով, որը շատ է սիրում իր քաղաքը։ Իսկ Կազանի «Լեբյաժյե» այգու ստեղծման շրջանակներում վերածնել են 15 տարի առաջ անհետացած լիճը, եւ դա աննախադեպ է Ռուսաստանի համար»,- հոկտեմբերի 19-ին մրցանակաբաշխության ժամանակ պատմել է Թաթարստանի Հանրապետության նախագահի օգնական Նատալյա Ֆիշման-Բեկմամբետովան։
Նշելով քաղաքային հասարակական տարածքների զարգացման ասպարեզում Թաթարստանի Հանրապետության նվաճումները՝ 8 80 Сities-ի հիմնադիր և World Urban Parks-ի դեսպան Գիլ Պենյալոսը (Կանադա) ասել է․ «World Urban Parks ասոցիացիան ստեղծվել է նրա համար, որպեսզի փորձը փոխանակվի, որպեսզի յուրաքանչյուրը յուրաքանչյուրից եւ բոլորը բոլորից սովորեն։ Յուրաքանչյուր մարդ պետք է ունենա այգու որակյալ միջավայր՝ մեկ քայլ հեռավորությամբ։ Յուրաքանչյուր քաղաք պետք է ունենա այգիների լավ համակարգ, որտեղ տարբեր տարիքի մարդիկ կարող են բարելավել իրենց հոգեկան և ֆիզիկական առողջությունը, իրենց հարմարավետ միջավայրում զգալ։ Եվ Կազանը զարմանալիորեն հաջողակ է այս նախաձեռնություններում։ Միայն վերջին հինգ տարիներին ստեղծվել է ավելի քան 330 հանրային տարածք՝ այգիներ, որոնք տարեկան 50 շաբաթ, բոլոր չորս եղանակներին օգտագործվում են՝ դա հրաշալի է։
International Large Urban Parks Awards-ի ոսկե մեդալակիր է դարձել Մեքսիկայի Bosque de Chapultepec հանրահայտ այգին։ Բրոնզե մրցանակը ստացել են երկու այգիներ՝ Queen’s Park-ը՝ Նոր Զելանդիայում, և Penang City Park-ը՝ Մալայզիայում։
«Պատվավոր ճանաչում» (Honorary Recognition) մրցանակը տրվել է թուրքական Hasan Celal Guzel Millet Bahcesi այգուն։
Ժառանգության պահպանման համար մրցանակը (Legacy Award) շնորհվել է սինգապուրյան Gardens by the Bay այգու ստեղծող և նախկին գլխավոր տնօրեն դոկտոր Կիատ Բ․ Տանին։ Այն օբյեկտները, որոնք զարգացրել է դոկտոր Տանը Սինգապուրում, ներառվել են ՅՈՒՆԵՍԿՕ-ի համաշխարհային ժառանգության ցուցակում։
Այգիների ստեղծման մշակույթի զարգացման մեջ անհատական ներդրման համար (Distinguished Individual Award) պարգևատրվել է նորվեգացի լանդշաֆտային ճարտարապետ Տորգեյր Սորենսենը, որը ղեկավարում է երկրի ամենախիտ բնակեցված Ստավենգերե քաղաքի այգիների և փողոցների կառավարման վարչությունը։
World Urban Parks-ի քաղաքականության համաձայն, մրցանակ կարող են ստանալ ինչպես կազմակերպությունները, այնպես էլ առանձին համայնքները և մասնավոր անձինք, որոնք նպաստում են աշխարհում այգիների զարգացմանը։ Գնահատման հիմնական չափանիշը քաղաքացիների համար հարմարավետ հասարակական տարածքների և հանգստի գոտիների ստեղծումն է։
World Urban Parks-ը միջազգային կազմակերպություն է, որը ստեղծվել է 2015թ․՝ Այգիների և հանրային տարածքների միջազգային ֆեդերացիայի (Ifpra) և Քաղաքային այգիների ու կանաչ տարածքների դաշինքի (Parks for Life) միաձուլման արդյունքում։ World Urban Parks-ի կազմի մեջ մտնում են ամբողջ աշխարհով մեկ այգիների և հանրային տարածքների ներկայացուցիչներ, ինչպես նաև քաղաքային վարչակազմերի, քաղաքային տարածքների զարգացման հարցերով խորհրդատվական գործակալությունների, լանդշաֆտային կազմակերպությունների և համալսարանների ներկայացուցիչներ՝ Ավստրալիայից եւ Նոր Զելանդիայից մինչև ԱՄՆ և Ռուսաստան։
World Urban Parks-ի առաքելությունը կազմակերպության մասնակիցների փորձի կենտրոնացումն է՝ քաղաքներում կյանքի համար պայմանների բարելավման նպատակով նախաձեռնություններ զարգացնելու համար։ Կազմակերպությունը զբաղվում է քաղաքային այգիների աջակցությամբ և զարգացմամբ, շրջակա միջավայրի պահպանությամբ, այգիների մասնագետներ կրթելով և հավատարմագրելով, ազգային, տարածաշրջանային և տեղական կառույցների հետ համագործակցությամբ համաժողովներ և այլ միջոցառումներ անցկացնելով։
World Urban Parks միջազգային համաժողովի առաքելությունը այգիներ և հանրային տարածքներ ստեղծելու միջազգային լավագույն մոտեցումների և պրակտիկայի վերլուծությունն է, ինչպես նաև ժամանակակից այգիների ստեղծման գործնական ուղեցույցների ձևավորումը։