Մեր հանրության մեջ թյուր պատկերացում կա, թե ինչ է նշանակում անկախ դատարան. Ավետիք Իշխանյան
Մեր հանրության մեջ թյուր պատկերացում կա, թե ինչ է նշանակում անկախ դատարան: Այս մասին, այսօր՝ հոկտեմբերի 18-ին, «ՀՀ իրավական մարտահրավերները» խորագրով քննարկման ժամանակ նշեց իրավապաշտպան, Հայաստանի հելսինկյան կոմիտեի ղեկավար Ավետիք Իշխանյանը:
«ՀՀ սահմանադրության մեջ գրված է, որ իշխանությունը պատկանում է ժողովրդին եւ հաճախ այս նախադասությունը վերագրվում է նաեւ իշխանությանը: Ես կուզեի, որ Սահմանադրության մեջ ոչ թե այդպես գրված լիներ, այլ գրված լիներ՝ ՀՀ-ում գործադիր իշխանությունը ձեւավորվում է ընտրությունների միջոցով, քվեարկությամբ մեծամասնություն ստացած ուժի կողմից:
Երկրորդ, շատերը նշում են, որ դատարանները ժողովրդի կարծիքը չեն արտահայտում: Եթե մենք խոսում ենք անկախ դատական իշխանության մասին, ապա դատարանները չպետք է պատկանեն ոչ փոքրամասնությանը, ոչ մեծամասնությանը, ոչ էլ նույնիսկ պատկերացնենք 100 տոկոսանոց ժողովրդին: Եթե մենք համարում ենք, որ դատարանները պետք է լինեն մեծամասնությանը, ապա այդ դեպքում դատարան պետք չի, կարելի է Լինչի դատաստան իրականացնել եւ վերջ»,-հայտարարեց Ավետիք Իշխանյանը:
Նա նկատեց, որ միշտ էլ Հայաստանում դատարանները, որպես ամբողջ շղթայի մի մաս, օգտագործվել են որպես իշխանությունը պահելու գործիք:
Ավետիք Իշխանյանը հարց է բարձրացնում, Եթե Հրայր Թովմասյանը ենթարկվեր իշխանություններին, արդյո՞ք այս հետապնդումները կլինեին:
«Սա Հրայր Թովմասյանի հարցը չէ. երբ նա արդարադատության նախարար էր, իմ և նրա հարաբերությունները բավական սրված են եղել,- նշեց իրավապաշտպան, Հայաստանի հելսինկյան կոմիտեի ղեկավար Ավետիք Իշխանյանը.- Հարցն այն է, թե եթե Հրայր Թովմասյանը ենթարկվեր այսօրվա իշխանություններին և նրան հաճո որոշումներ կայացներ, արդյո՞ք այս հետապնդումները կլինեին: Միանշանակ պատասխանում եմ՝ ոչ: Օրինակ, այսօրվա գլխավոր դատախազը, ինչպես ասում են, նույնպես հին ռեժիմի ներկայացուցիչն է, հանկարծ մի մեղադրանք չպաշտպաներ կամ Դավիթ Գրիգորյանի դեմ գործ չհարուցեր, երանի կտայիք այստեղ նստածներդ, այն ինչ այսօր կատարվում է Հրայր Թովմասյանի նկատմամբ»,-ասաց իրավապաշտպանը:
Նա նշեց, որ մեծ ոգևորություն է ունեցել հեղափոխության հետ կապված, որովհետև չէր ուզում, որ Հայաստանը դառնա արեւելա-ասիական պետություն, որտեղ մեկ մարդ հավերժացնում է իշխանությունը, սակայն յսօր արդեն չի կարող լռել: Իշխանյանն ասաց, որ իր համար կարեւոր ահազանգ էր, երբ դատավոր Ալեքսանդր Ազարյանի վերաբերյալ բացահայտեցին, որ նա գրագող է. «Այլ բան, որ ԲՈՀ-ի ղեկավարը գրագողության մեծ ցուցակ ներկայացներ եւ դրա մեջ լիներ նաեւ Ազարյանի անունը, բայց պարզվեց միակ գրագողը Ազարյանն է: Հաջորդը, երբ դատավոր Դավիթ Գրիգորյանի հետ կապված հանկարծ հիշեցին հին դեպքեր: Եթե նրանք կայացնեին իշխանահաճո որոշում, կասկածո՞ւմ եք, որ որեւէ հարց չէին ունենա: Բոլորս գիտենք, թե ով է դատավոր Մնացական Մարտիրոսյանը, ինչ գործեր է քննել, հիմա նա բացարձակ հիանալի է: Պատկերացրեք, որ Մնացական Մարտիրոսյանը փոխեր Մանվել Գրիգորյանի խափանման միջոցը, ինչ կկատարվեր նրա հետ: Ամբողջ հասարակությունը կհիշեր նրա նախկին գործունեությունը:
Շուրջ մեկ տարի Հրայր Թովմասյանը իշխանական վերնախավի մեջ էր, նրանց հետ լավ հարաբերությունների մեջ էր ու հանկարծ սկսեցին քավոր սանիկով, իսկ հիմա լրիվ փաչ ու սահման անցել են»,-ասաց նա՝ հավելելով, որ նրանք, որոնք լռում են, նպաստում են գավառական 37 թվի ստեղծմանը: