Հայաստանը պետք է սովորի կանխել արտակարգ իրավիճակները, ոչ թե վերացնել հետեւանքները. Ցոլակյան
Հայաստանում հիմնականում պայքարում են արդեն ծագած բնական աղետների եւ ԱԻ հետեւանքների դեմ։ Բայց դրանց հիմնական մասը, համապատասխան կանխարգելիչ միջոցների ձեռնարկման դեպքում, կարող է ավելի քիչ ազդեցություն ունենալ եւ ավելի քիչ վնաս հասցնել։ Այս մասին հոկտեմբերի 18-ին «Դիմակայող Հայաստան» թեմայով խորհրդարանական լսումների ժամանակ ասաց Հայաստանի արտակարգ իրավիճակների նախարար Ֆելիքս Ցոլակյանը։
Նման ռիսկերի գնահատումը, դրանց առավելագույն հնարավոր մեղմումը, նրա խոսքով, պետք է դառնան երկրի զարգացման անկյունաքարը։ «Երկրի զարգացման գործընթացները չպետք է ավելացնեն առկա ռիսկերի սպառնալիքները։ Զարգացումն, իր հերթին, չպետք է անկայուն եւ անպաշտպան լինի առկա ռիսկերի առջեւ»,- ընդգծել է Ցոլակյանը։ Նա ավելացրել է, որ այս նպատակին հասնելու համար պետք է իրականացվի օրենսդրական բազայի լուրջ բարեփոխում, ինչին էլ, նրա կարծիքով, պետք է ուղղվեն կառավարության եւ խորհրդարանի հիմնական ջանքերը։
Նա հատուկ կարեւորեց աղետների սպառնալիքների դեմ համատեղ պայքարի եւ հակազդման հարցում հանրության ու պետության բոլոր կառույցների համագործակցությունը: Նախարարի կարծիքով՝ այդ համագործակցությունը պետք է լինի թափանցիկ եւ գիտակցված: Ցոլակյանը կարեւոր է համարում քաղաքացիների համապատասխան տեղեկացվածությունը եւ բնակչության շրջանում լայնածավալ կրթական աշխատանքի անցկացումը՝ քաղաքացիների գիտակցության եւ այդ թեմայով նրանց գիտելիքների մակարդակի բարձրացման համար, ինչը, նրա կարծիքով, թույլ կտա բարձրացնել տարերային աղետների հետեւանքների մեղմացմանը նպաստող նախազգուշական միջոցների իրականացման արդյունավետությունը: